Diretora Eskola, Ilda Belo, hatete agora daudaun sira hala’o ona sira nia prossesu aprendizazen hodi hein ezame daruak nian, nune’e bele prepara ba ezame nasionál, tanba durante ne’e estudante barak mak la hetan matéria.
“Ho ida-ne’e, agora daudaun sira kontinua prepara ona matéria hodi fasilita estudante-sira ba estuda,” dehan nia iha knar fatin EBC Akadiru-hun, Kinta (23/09).
Reativasaun ne’e, bazeia ba despaixu Governu nian, hodi reativa aula prezensiál, maibé estudante barak mak seidauk tama, tanba situasaun pandemia Covid-19, Ida-idak fila ba munisípiu.
Atividade eskola seidauk másimu tanba estudante no profesór barak seidauk hetan informasaun.
Totál estudante iha eskola ne’e ba tinan 2021 hamutuk 1.530, husi númeru ne’e maioria estudante seidauk partissipa iha ensinu aprendizazen prezensiál, tanba seidauk hetan informasaun.
Eskola ne’e ho totál professór na’in 46, ne’ebé 100% hetan ona vasina kontra Covid-19.
Ministériu Edukasaun Juventude no Desportu (MEJD) liu husi servisu edukasaun munisipiu Dili, halo ona observasaun katak, iha eskola hamutuk 99 mak prienxe ona kritéria prinsipaá hanesan vasina Covid-19, no preparadu atu reativa aula prezensiál.
