Sekretáriu Estadu Protesaun Sivil, Domingos Mariano Reis hatete, iha tinan  2024, SEPS sei konstrui edifisiu Bombeiros ninian iha munisípiu Ainaro, Bobonaro inklui iha munisipiu tolu seluk ne'ebé tama ona iha ajenda prioridade.

“Ita iha prosesu planu hatama ona iha orsamentu no ba infraestrutura nian ita integra hotu ba iha Ministeriu Planeamentu Investimentu Estratejiku ho Ministériu Obras Publikas haree ajusta, depois sira koordena ho CNA oinsá atu loke prosesu ba tenderizasaun, maibé ne'e ba tinan oin. Prioridade liu maka munisipiu Ainaro, Oekusi, Likisa, Ermera ho Bobonaro,” dehan Sekretáriu Estadu, Domingos, Iha Kaikoli-Dili, Segunda (06/11).

Domingos dehan, total orsamentu ba harii edifisiu seida'uk hatene ninia númeru klaru, maibé iha planu orsamentu ba tinan 2024 nian, inklui adisional ne'ebé prevee iha laran ne'e mós orsamentu ba harii edifisiu hamutuk hotu.

“Orsamentu ne'ebé koloka ba iha protesaun sivil miliaun $6, maibé iha komisaun revizaun orsamental ninian ita halo pedidu adisional milaun $1.6, depois sei lori ba Konsellu Ministru (deside), lori ba parlamentu hetan aprovasaun hodi lori ba Prezidente Repúblika promulga. Maibé ita hein prosesu semana ida ka rua ne'e nia laran, depois maka haree,” nia informa.

Nia argumenta, planu prioridade 2024 ba ninia gabinete husi total orsamentu ne'ebé iha, sei hadi'a rekursu umanu, sei halo mós revizaun ba lei baze protesaun sivil inklui infraestrutura, nune'e mós ba iha asuntu seluk ne'ebé prinsipal hodi bele apoiu servisu di'ak  liutan.

Maibé la'os ne'e de'it, governante ne'e mós afirma tan katak, husi orsamentu ne'ebé aprezenta karik hetan konsiderasaun, sei uza mós ba halo rekrutamentu membru foun na'in 50 iha tinan oin.

Nune’e mós, uza ba harii postu bombeiros ni’an iha sitiu turistiku Ramelau ne'ebé nu'udar área protejidu Timor ninian, iha Natarbora harii mós hodi asegura planu governu dada kadoras mai, sei konstrui postu ida iha Illa Ataúro hodi responde ba El Nino ka rai manas ho temperatura aas ne'ebé Timor enfrenta hodi bele halo intervensaun lalais karik mosu insendiu ruma inklui mos sosa karreta ne'ebé apoiu hodi halais liutan servisu iha situasaun emerjénsia ruma.

“Membru sira-ne'ebé rekruta sei koloka ba kada postu, sira servisu tornu katak servisu oras 8, depois sai ekipa ida kontinua, 24 oras prontu para atu responde. Aliende ne'e mós sei sosa tan karreta tanki bee hodi bele halo kompleta tiha 6 ne'ebé iha ona, hodi bele apoiu hodi atua situasaun emerjensia ruma ne'ebé mosu,” tenik nia.