Sekretáriu Estadu Protesaun Sivil, Domingos Mariano Reis informa, Governu hahú apoiu emerjénsia ai-han vitima ne'ebé ninia uma ahi-han iha suku Lourba no Karabau inklui asidente sirkuitu eletrisidade ne'ebé provoka ahi-han uma-kain 4 iha Maubise.
Depois ida ne’e, nia haktuir, governu sei kontinua lori material konstrusaun hodi komunidade sira rekonstrui hikas fali sira ninia uma ne'ebé hetan estragus.
“Loron hirak liu-ba ne'e iha kazu boot ida ne'ebé mosu iha postu Bobonaro entre suku Lourba ho suku Karabau, ne'ebé afeta tebes ba iha komunidade sira iha suku Lourba uma-kain 14, hosi númeru hirak ne'e iha uma 6 mak hetan estragu total (hetan sunu), ne'ebé hetan estragu nato'on uma 2, uma 6 mak hetan estragu kaman,” Dehan Sektretáriu Estadu, Domingos, Iha Kaikoli,Segunda (06/11).
Domingos dehan, emerjensia ni’an Governu apoia ona iha iha sabadu ho Primeiru Ministru to'o kedas iha fatin akontesimentu hodi halo apoia emerjénsia ba vitima sira hanesan ai-han foos, tenda inklui bikan, sana no kanuru.
“Material rekuperasaun (konstrusaun) ha'u aselera lalais, parese iha semana ne'e nia laran tarde liu maka Sabadu to'o ona iha ne'eba para komunidade sira bele rekonstrui fali sira nia uma ne'ebé hetan sunu. Material sira-ne'e mak hanesan simente, besi, kalen, pregu no material sira ne'ebé uza para rekonstrui fali sira nia uma,” dehan nia.
Nia afirma, orsamentu ne’ebé atu sosa material konstrusaun nian ne'e mai hosi orsamentu tinan 2023, inklui mos foti material balun ne'ebé rezerva hela iha armazen protesaun sivil ninian hodi lori ba apoiu vitima sira iha suku ne'ebé sai vitima ba konfrontu ne'ebé foin lalais akontese iha Bobonaro inklui mos asidente ne'ebé akontese iha Ainaro kauza hosi sirkuitu elitrisidade.
“Inklui mos iha Maubise akontese insendiu uma kain haat (4) ahi-han kauza husi sirkuitu eletrisidade no orasida (horisehik) ha'u tenki to'o Maubise para halo apoiu emerjensia semana ne'e nia laran aselera para material rekuperasaun lalais tanba agora udan” tenik nia.
Alende ne'e, governante ne'e mos informa katak la'os de'it material, maibé governu mos iha komitmentu apoiu orsamentu uitoan ba vitima sira kauza husi konfrontu iha Bobonaro no vitima sira ne'ebé iha Ainaro ninia uma hetan insendiu kauza husi sirkuitu elitrisidade, maibé apoiu ne'e mos tuir ninia kategoria estragu.
“Ita iha orsamentu oitoan ba mão de obra depende nia kategória grau estragu ho transporte. Ba transportehotu-hotu $150. Ida ne'ebé estragu total (sunu) sei hetan $850, ne'ebé estragru nato'on sei hetan $750 no idane'ebé hetan estragu kaman sei hetan $600,” nia informa.
