Tuir Diretór Nasionál Infrastrutura Edukativa, Helio Lopes hatete, kontrusaun eskola foun ne’e prioridade Ministeriu Edukasaun (ME) nian, tan ne’e iha tinan 2024, ME aloka millaun $3 atu realiza tan projetu 20 iha teritóriu laran tomak.
Nia dehan, no alokasaun ne’e la’os ona ba projetu komunitáriu maibé ba liu husi prosesu aprovizionamentu ne’ebé sei jere husi kompanha ne’ebé sei tuir konkursu.
“Ita iha millaun $3 ba kontrusaun no re-habilitasaun eskola sira ne’ebé alokasaun ne’e la’os ona ba projetu komunitáriu maibé ba liu husi prosesu aprovizionamentu ida ne’ebé sei jere husi kontratór ka kompaña sira ne’ebé mak sei tuir konkursu,” dehan Diretór ba Jornalista sira iha Uma Koffi-Anan Kaikoli, Segunda (19/02).
Diretór afirma, ba projetu hirak ne’e, dadaun iha hela faze verikasaun dokumentus no tempu badak dalaruma iha trimestre dahuluk nia rohan bele ona iha konkursu públiku ba projetu foun sira ne’e.
“Identifika ona eskola balun tanba ne’e ita iha planu prioridade, depois submete lista prioridade bainhira hetan aprovasaun iha momentu ruma tan agora iha ona orsamentu atu hodi implementa,” katak diretór.
Enkuantu, Projetu 20 kompostu husi pre-eskolar projetu 10, ensinu baziku iha sia (9) no eskola sekundariu Tekniku Vokasional rua no re-habilitasaun ESTV ida, no hirak ne’e mak sei realiza iha tinan ida ne’e.