SEKoop Fiar CU-FALIRA Lori Membru ba Moris Di’ak Featured

By Ekipa INDEPENDENTE Fevereiru 19, 2024 888
Sekretariu Estadu Kooperativa (SEKoop) fiar Kooperativa Kréditu Uniaun Furak Aban Iha Liman Rasik (CU-FALIRA) sei lori nia membru kooperativa sira sai moris di’ak. Foto:INDEPENDENTE. Sekretariu Estadu Kooperativa (SEKoop) fiar Kooperativa Kréditu Uniaun Furak Aban Iha Liman Rasik (CU-FALIRA) sei lori nia membru kooperativa sira sai moris di’ak. Foto:INDEPENDENTE.

DILI: Sekretariu Estadu Kooperativa (SEKoop) fiar Kooperativa Kréditu Uniaun Furak Aban Iha Liman Rasik (CU-FALIRA) sei lori nia membru kooperativa sira sai moris di’ak.


Tuir reprezentante Sekretáriu Estadu Kooperativa (SEKoop), Francisco Xavier hatete, fiar katak, estrutura husi konsellu diretiva no fiskál atu re-avalia no hadia fila fali sira-nia jestaun hodi bele di’ak liután iha futuru mai.
“Oinsa mak sira-nia partisipasaun iha movimentu ne’e liu liu ba membru sira atu nune’e sira-nia kontribuisaun ba kooperativa CU-FALIRA ne’e maka’as e ha’u fiar katak ho diretiva sira ho membru sira hamutuk hodi haree sira nia atividade durante ne’e tinan ida la’o bele halo re-avalia fila fali ba sira nia atividade ne’ebé iha e karik e sira nia jestaun balun nne’ebé mak sira fraku entaun oinsa mak sira hamutuk hadia ba oin ne’e bele hadia diak liu tan e bele CU falira ne’e ble lori sira ba moris di’ak,” dehan nia iha Salaun FCCHM Bairo Pité (17/02).
Reprezenta SEKOOP, hato’o lia hirak ne’e hafoin partisipa Assembleia jerál ba tinan 2023 ho Tema “hamutuk ho CU-FALIRA ita garante tranparansia no akuntabilidade hodi kontribui ba moris diak membru sira-nian” ne’ebé realiza iha Salaun FCCHM Bairo Pité, Sábadu (17/02)
Nia haktuir, dadaun ne’e ita iha ona oinsa mak atu halo levantamentu ba dadus ba kreditu niaun sira ne’ebé estabele ona.
“ita hatene kona-ba nia númeru atu it abele fasil akompanha sira tantu husi nasional tantu husi munisípiu,” nia afirma.
Alende ne’e mak oinsá atu hasa’e sira-nia kapasidade liu ba iha area kooperativa ninian atu nune’e sira iha koñesimentu di’ak bele kontinua kontribui ba kooperativa sira iha teritóriu.
Iha sorin seluk, prezidente Federasaun Prezidente Federasaun Kooperativa Kréditu Hanai Malu ((FCCHM-sigla Portugés), Flavio M.G da Silva husu CU-FALIRA kontinua sai kresimentu ida di’ak husi membru no kapitál.
Nia afirma, iha pontu haat ne’ebé sai importante ba Kooperativa Kréditu Uniaun sira, mak AGM, Kresimentu Membru, Kresimentu kapitál, no sasukat ikus hanaran divididas ka fahe osan funan ba membru sira.
“Ohin hau dehan katak, hanesan sasukat ba CU sira ne’ebé di’ak ne’e, ita haree husi buat lubuk ida. Pontu ida mak ko’alia kona-ba assmebleia Jeral membru ne’e, iha ne’ebá sai sasukat ida katak, halo asmbleia jeral ne’e pelu menus tinan ida dala ida, pontu segundu mak kresimentu membru, ohin relatóriu ne’ebé ita rona kresimentu membru Falira ne’e purvolta 30 ba 40 pursentu katak, kresimentu ba membru ne’e boot, pontu terseiru mak koalia kona-ba kresimentu kapitál sira nia capital mos aumenta, depois sasukat ida seluk mak koalia kona-ba SHU (Sisa Hasil Usaha) ohin mós SHU atu fahe ba membru sira, fó mós prezente ba membru sira, ba membru sira ne’ebé konsege halibur osan barak liu, rai osan barak liu, entaun ne’e hanesan motivasaun ida va membru para atu kontinua rai osan” afirma nia.
Tuir nia, espetativa ba CU-FALIRA sai kresimentu ne’ebé di’ak tebes no konsidera Federasaun Hanai Malu hanesan sumbrinña ida kooperativa sira hotu e federasaun iha obrigasaun ida atu kontinua servisu, kontinua ho akompañamentu kontinua ho monitorizasaun e fo asistensia ruma karik CU sira presiza no fiar katak CU-FALIRA iha filleira ida ne’e.
Iha fatin hanesan Dirijente CU-FALIRA, Fernando dos Reis hatete, AGM agora dadaun realiza ne’e ba dala hitu (7) hahú husi nia ezistensia iha tinan 2012 ne’ebé mai ho nia polítika ida atu hakmaan membru sira husi krize ekonomia.
“ezisténsia CU-FALIRA ne’e atu fó intensivu ba membru sira atu sees husi krize ekonomia ne’e ita hatene katak nia-rain agora iha buat barak maibé kooperativa CU-FALIRA hola parte ba dezenvolvimentu ida ne’e, tanba ne’e mak atu refleta katak CU-FALIRA agora ami-nia metas mak atu sustentabiliza akontabiliza ekonomia familia liu ba membru sira”
Dadaun ne’e atividade sira ne’ebé membru no dirijente CU-FALIRA halo mak halo atividade konsumu, propriedade no dadaun ne’e polítika ida atu empréstimu rai.
Nia haktuir, membru maioria ne’ebé envolve iha Kooperativa refere maioria asesu ba kréditu maibé la asesu ba kréditu ne’e kuaze pursentu 10.
Bainhira membru ne’ebé kréditu osan mak la selu, kooperativa iha komité ida oinsa atu buka tuir membru refere, hodi konversa kona-ba problema sira ne’ebé hasoru razaun la seluk kréditu tuir tempu determinadu.
Ezisténsia CU-FALIRA hahú iha tinan 2012 no rejistu legalidade iha Notariadu husi Ministériu Justisa sai Kooperativa Kréditu Uniaun iha Timor-Leste iha tinan 2014 no oras ne’e dadaun membru hamutuk 728 nune’e kresimentu membru sa’e ba 213, totál kapitál CU-FALIRA hamutuk $400.000.00 resin, osan sira ne’e maioria sirkula iha membru sira nia liman.

Rate this item
(0 votes)

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31