Nia haktuir, iha ona diskusaun ho Komandu Jerál PNTL kona-ba preparasaun vaga ba rekrutamentu membru polísia foun iha tinan 2024, ne’ebé kompostu husi ajente ho ofisiais.
"Ita nia Komandu Jerál PNTL rekomenda tinan oin 2024, ita loke vaga ba rekrutamentu membru polísia foun kompostu husi ajente ho ofisiais hamutuk nain 500, maibé ida ne'e ita sei haree espasu fatin iha Sentru Formasaun Polísia Akademia Komoro akumula kandidatu sira atu tuir formasaun, " Dehan Francisco ba jornálista sira iha Sentru Formasaun Polísia Akademia Komoro(28/09).
Nia Dehan Tinan oin 2024, Governu hakarak loke vaga rekrutamentu membru PNTL foun ho tipu rua ida mak ajente no ida seluk ofisiais atu responde fali ba membru Polísia sira ne'ebé mate no balun idade tama ona ba reforma.
"Agora ha'u ko'alia ho Komandu Jerál PNTL kona-ba prosesu loke vaga ba rekrutamentu membru polísia foun, maibé Komandu PNTL husu atu tinan oin ne'e ita rekruta hamutuk 500, tanba ne'e agora ami haree fatin no kapasidade ba formasaun, nune'e tinan oin hahú loke vaga ba rekrutamentu," Hakotu nia.
Molok ne'e Komandante Jerál Polísia Nasionál Timor-Leste (PNTL) Komisariu Jerál Polísia Henrique da Costa hateten, Komandu rekomenda ba governu tinan oin 2024 tenki tau prioridade ba rekrutamentu membru Polísia Foun.
Nia dehan rekrutamentu ba membru PNTL foun ne'e kada tinan sai prioridade ba Komandu Jerál PNTL hahú kedas komandante jerál sesante too agora nafatin tau iha prioridade, maibé seidauk implementa, tanba iha ona planu sei halo rekrutamentu membru Polísia Foun iha tinan oin.
"Ohin ita aprezenta ba ministru interior kuandu tinan oin laiha rekrutamentu ba membru PNTL foun ita labele hanoin tinan lima mai tan ita halo servisu ho diak, tanba ne'e ita rekomenda hakarak tinan oin ita tenki halo rekrutamentu membru Polísia Foun," dehan Henrique ba Jornálista hafoin remata aprezenta relatoriu fulan tolu ba Ministeriu Interior iha salaun laline Larigutu CNE Kaikoli,l foin lalais ne'e.
Nia afirma, tinan oin Governu laiha rekrutamentu ba membru PNTL foun mak tinan lima mai PNTL halo atendimentu ba krime sira iha Timor-Leste, ema Kriminozu sira sei atende fali Polísia.
"Tinan oin ita lakohi halo rekrutamentu ba membru PNTL foun mak ita ba halo atendimentu ba Kriminozu sira ne'e Kriminozu sira bele fila atende fali ita, tanba ita iha Polísia ne'ebé mak idade avansadu nia forsa mós laiha ona ita hasoru Kriminozu sira ita sei lakon," afirma nia.
Tanba ne'e Komandu Jerál PNTL husu ba Governu liu liu Ministru Interior atu halo rekrutamentu ba membru PNTL foun tenki iha kontinuasaun kada tinan, tanba ne'e planu koamandu PNTL hakarak tinan 2024 too 2028 kada tinan halo rekrutamentu.
"Ita iha planu ba tinan oin 2024 too iha 2028 nian hakarak tinan ida ita halo rekrutamentu ba PNTL foun hamutuk 500 kada tinan ne'e di'ak, maibé ita mós tenki haree fali ba iha fasilidade para haree ema nain hira mak ita bele akumula iha sentru fromasaun polísia akademia Komoro," tenik nia.
Tuir dadus estatistika Komandu Jerál PNTL Komisariu Jerál Polísia Henrique da Costa aprezenta iha relatoriu ba Ministru Interior membru Polísia ne'ebé dadaun ne'e hela servisu hamutuk 3.874, kompostu husi mane 3.269 no feto 605 mak sei ativu iha instituisaun PNTL.
