Tuir Jestor Tuberculoze José Maia Soares hatete, husi kazu 494 ne'e, pasiente na’in sanulu resin ida (11) lakon ona vida.
“Iha tinan 2023 hahú husi Janeiru to'o Dezembru iha Klínika Bairu Pité ita rejista kazu Tuberculoze hamutuk 494, husi númeru ne'e mate hamutuk 11," dehan nia iha klínika Bairu Pité, (30/12).
Nia hatutan, Kazu Tuberkuloze 494, iha pasiente hamutuk 23 mak hetan tratamentu ho di’ak no sira seluk kontinua simu ai-moruk.
Ho Ida ne'e, nia husu pasiente sira tenke kumpri oráriu atu hemu ai-moruk rutina, durante fulan neen (6) to'o fulan sia (9), atu bele rekopera husi sira-nia moras, se lae bele hamosu mate. Tanba ne'e, Klínika Bairu-Pité prontu atu ajuda pasiente sira, nia kompromete.
Nia esplika, Tuberkuloze mak moras ida-ne'ebé kauza husi moras ne'ebé habelar husi ema ba ema, liu husi anin no Tuberkuloze baibain afeta pulmaun, maibé bele mós afeita parte seluk iha isin lolon, hanesan kakutak, rins. No, ema ne’ebé moras bele lakon sira-nia vida se bainhira sira la hetan tratamentu lalais no ho di’ak.
Entretantu, Administradora Divizaun Fundu Globál, Madalena Hanjam konsidera, atu kombate moras Tuberkuloze presiza ema hotu nia kontribuisaun no kolaborasaun.
“Moras ne'e la'os foin eziste iha ita-nia rai, maibé hahu husi ita-nia avo sira-nia tempu. Ita atu kombate moras ne'e presiza esforsu hamutuk iha tinan 2024,”dehan nia.
Atu prevene moras ne'e tenke halo kontrola ba membru família sira seluk no hare'e mos ai-han, kontrola sasan sira hanesan toalla no toba hamutuk tanba oras ne'e difísil atu hakotu, maske ai-moruk barak hodi halo tratamentu no prevensaun.
