Ministru Edukasaun Juventude no Desportu, Armindo Maia hateten, tuir loloos ezame passazen klasse ne’e sei realiza iha loron 21 fulan novembru, maibé muda fali ba loron 14 novembru, nune'e fó biban ba MEJD hodi halo atribuisaun prémiu ba estudante mellór klasifikadu sira.
“Ita hadi'a ona kalendáriu ezame pasazen klase ba estudante sira hodi bele iha tempu atu kurize rezultadu ezame. Nunee, iha fulan dezembru nia laran ita bele halo atribuisaun ba estudante sira,” nia hateten iha MEJD, Kinta (10/11/2022).
MEJD konsidera alterasaun ida ne'e hodi sukat kondisaun balun, karik mosu reklamasaun iha tempu atu rezolve kestaun sira ne'e.
Tanba ne'e, MEJD husu ba eskola sira hotu atu kumpre nafatin desizaun ne'ebé ériu hatun hodi prepara matéria ezame ba estudante sira ho di'ak.
Kona-bá ne’e, Diretór ESJ Heroi da Pátria, José Dias Guterres konsidera desizaun MEJD nian halo alterasaun ba kalendáriu ezame pasazen klase ne'e prejudika tebes prosesu korresaun pontu ezame lokál.
"Ha'u nu'udár diretór eskola no veteranu ida la konkorda ministériu halo alterasaun fila fali kalendáriu ezame pasazen klasse nian ba loron 14 novembru. Tanba ami halo hela korresaun pontu ezame lokál durante loron-tolu, hahú segunda to'o kuarta, oinsa ami atu halo preparasaun ba éria sira," nia protesta.
