Tanba ne’e, Deputada ne’e husu ba Ministériu Saúde atu bele kontinua kontrata pesoál saúde hirak ne’e iha Orsamentu Jerál Estadu (OJE) tinan 2023 ne’ebé ho nia montante boot tebes.

“Komisaun F ne’ebé trata asuntu saúde hatene katak, planu Ministériu Saúde sei halo rektutamentu ba pesoál saúde maski la tó’o 3.000 maibé sujere atu bele atu tau prioridade liu ba pesoál saúde hirak ne’ebé oras ne’e sira nia kontratu atu remata ona,” nia hateten iha PN, Kinta (10/11/2022).

Nia husu ne’e tanba durante ne’e Komisaun F mós halo fiskalizasaun ba rekursu umanu iha sentru saúde, postu saúde  sira iha territóriu tomak sei menus tebes.

Tanba ne’e, nia husu MS atu kontinu kontrata pesoál saúde hirak ne’e hodi koloka ba fatin sira ne’ebé mak presiza tebes.

Molok ne’e Ministra  Saúde,  Odete Maria Freitas Belo hateten, Ministériu Saúde notifika ona pesoál saúde hamutuk 3.000 ne’ebé nia sira nia kontratu  atu remata iha fulan dezembru 2022.

Karta notifikasaun  ne’e  hato’o  tiha ona, hodi hapara sira nia kontratu  tanba osan la iha atu selu sira, nune’e mós  sira ne’e la’ós funsionáriu públiku.

Ho rekomendasaun ne’ebé Parlemntu fó iha ámbitu diskusaun jeneralidade OJE 2023, Ministra ne’e mós nota atu haree posibilidade hodi hare fila-fali no husu ba diretór Munisipiu sira hodi hare fali ba mapamentu rekursu sira nune’e sira sira ne’ebé kontratu atu remata iha fulan dezembru ne’e bele kontinua sira nia serbisu hanesan funsionáriu públiku iha MS.