Deklarasaun Prezidente PN ne’e mosu hafoin Aliansa Maubere Nasionál hala’o asaun kontra politika PN hodi sosa karreta foun 30 ba deputadu sira.

“Ha’u laiha objesaun, plenáriu mak soberanu, sei iha proposta ruma, orsida iha espesialidade atu hasai plenariu deside, laiha buat ida,” dehan nia, iha Parlamentu Nasionál, Kuarta (09/11).

Maske nune’e, nia konvida deputadu sira hotu atu revé polítika atu fasilita viatura ba deputadu sira.

“Ida sosá kareta ne’e polítika ida sala tiha ona, ha’u konkorda ho ema, estudantes no joven sira ne’ebé agora halo manifestasaun,” dehan nia.

Aniceto dehan, governu hakat tiha ona ba polítika ba kargu xefia sira la atribui karreta, maibé atribui de’it subsidiu transporte. Enkuantu ba PN nian, nia dehan, iha estatutu deputadu hatete deputadu sira iha  direitu ba transporte.

“Direitu transporte la signifika tenke hetan karreta, interpretasaun ida ne’e iha 2007, iha segunda lejizlatura, uluk Fretilin kontra sosá karreta ne’e, ha’u xefe bankada ha’u mak hamriik iha oin kontra sosa karreta,” dehan nia.

Tuir nia, loloos atribui de’it subsídiu transporte, tanba interpretasaun dehan direitu transporte la signifika tenke sosa karreta ba deputadu sira.

“Agora sosá  tiha ona, kuandu karreta iha problema hela de’it ita tenke haree fila-fali polítika ida ne’e, karik ita bele tuir governu nia politika, ita define subsidiu transporte, klaru ho montante  ne’ebé razoavel,” katak nia.

Molok ne’e, Aliansa Maubere Nasionál (AMN) iha sira-nia asaun pasifiku, ezíje ba PN atu kansela sosa karreta Pajero Sport no laptop ba deputadu sira.

“Ita rezeita totál ho polítika parlamentu nasionál atu sosa karreta sport ho laptop ba membru parlamentu sira,” deklara Tuir Portavós AMN, Gaspar Maugamu iha ninia intervensaun durante asaun pasífika iha Kampus Sentrál UNTL, Segunda (07/11).

AMN konsidera katak, politika sosa karreta foun no laptop nu’udar injustisa boot ida ba povu Timor-Leste, tanba deputadu sira tuir loloos ba ukun atu reprezenta povu no atu ko’alia povu ninia problema.

Entretantu, Deputadu sira iha Parlamentu Nasionál aprova orsamentu millaun $1 resin ne’ebé aloka ba sosa karreta foun 30 ba deputadu sira. Desizaun ne’e foti liu husi diskusaun no aprovasaun ba proposta orsamentu privativu Parlamentu Nasionál nian ba tinan fiskal 2023.

Husi total orsamentu millaun $1.950 ne’ebé aloka ba sosa karreta foun ne’e, kada karreta sei sosa ho folin rihun $65.

Proposta sosa karreta ne’e hetan aprovasaun ho votus a favor 45, kontra ida no abstensaun 11.