Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, numeru positivu ne’ebé rejista ohin menus kompara ho loron rua ikus. Nune’e, pasiente rekuperadu barak liu kazu detetadu foun.
Rui relata, kazu detetadu foun ohin, iha Kapital Dili na’in 39, Covalima 22, Lautem 11, Baucau 8, RAEOA 4, Bobonaro 1 no Vikeke 4.
“Husi total kazu detetadu foun ohin iha kazu 48 mak hatudu sintomas, sira ne’ebé vasina kompletu iha kazu 20 (22%) no sira ne’ebé foin hetan vasina doze dahuluk, iha na’in 7 (8%).
Nune’e, SIJK mós rejista pasiente ne’ebé rekupera husi moras Covid-19 hamutuk na’in 253 no kazu ativu ne’ebé baixa hela iha Sala Izolamentu hamutuk na’in 4.261.
Ho nune’e, total komulativu kazu konfirmadu sura husi loron 21 fulan-Marsu tinan 2020 to’o loron 4 fulan-Setembru tinan 2021 hamutuk na’in 17.468.
Enkuantu, ohin SIJK rejista sidadaun Timor-Oan na’in hat mate ho Covid-19.
Matebian na’in hat ne’e, kompostu husi bebe feto na’in ida, no ema bo’ot mane na’in tolu.
Total komulativu kazu óbitu hamutuk na’in 78.
“Bebé feto ho idade loron 12, inan hela iha Remexio, seidauk vasina, iha loron 23 fulan-Agostu 2021, moris husi inan diagnóstikadu ho Covid-19. Matebian sofre mós sífilis congenital. Hafoin moris hetan pneumonia tanba Covid-19, hala’o tratamentu iha semana ida ikus, nune’e, ohin iha tuku 12:20 oras Timor-Leste bebe hakotu-iis,”dehan nia iha komunikadu ne’ebé Online INDEPENDENTE asesu sabado ne’e.
Aleinde, matebian mane dahuluk ho idade tinan 76, hela iha Dili, seidauk vasina, iha loron 23 fulan-Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Iha loron ne’e kedas matebian hala’o tratamento iha Vera Cruz. Enkuantu, matebian hakotu-iis ohin iha tuku 14:55, iha Izolamentu Vera Cruz.
Familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste.
Mane daruak ho idade tinan 42, hela iha Lospalos, seidauk vasina, iha loron 3 fulan-Setembru tinan 2021 diagnóstikadu iha Lospalos ho sindroma insufisiénsia respiratória aguda (SIRA) tanba Covid-19. Nune’e, ohin dader iha tuku 05:35 oras Timor-Leste matebian hakotu-iis.
Enkuantu, matebian mane datoluk ho idade tinan 16, hela iha Lospalos, seidauk vasina, iha loron 3 fulan-Setembru 2021 diagnóstikadu iha Lospalos ho sindroma insufisiénsia respiratória aguda (SIRA) tanba Covid-19. Matebian sofre mós moras fuan ho anemia. Nune’e, matebian hakotu-iis iha sesta (03/09) lokraik, tuku 18:00 oras TL.
Entretantu, husi horiseik (03/09) mai ohin teste PCR ne'ebé Laboratóriu Nasionál Saúde halo hamutuk 245, ne’ebé kompostu husi, Vijilánsia sentinela na’in 53, Contact tracing 35, Random Screening 35, Viájen sai husi serka sanitária husi Dili 6, Viájen internasionál 33 no Follow up iha kuarentena 83.
Teste PCR ne’ebé halo horiseik (03/09) iha Munisipiu sira seluk, RAEOA no HNGV hamutuk 334.
Ohin, iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 95, kompostu husi kazu grave na’in 15, moderadu na’in 59 no leve na’in 21.
