Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, numeru kazu detetadu foun ohin, iha Ataúro na’in 18. Nune’e kazu foun iha Dili aumenta kompara ho loron horseik.

Enkuantu, numeru kazu positivu iha Munisipiu Baucau na’in 30, Covalima 14, Ainaro 1 no Bobonaro iha kazu 9.

“Husi kazu detetadu foun ohin, iha na’in 117 (78%) mak hatudu sintomas, sira ne’ebé simu ona vasina kompletu iha na’in 30 (20%) no na’in 5 (3%) foin hetan vasina doze dahuluk,”dehan nia iha komunikadu ne’ebé Online INDEPENDENTE asesu, domingo ne’e.

Nune’e, tuir dadus jeral ba loron ohin, iha kazu positivu foun na’in 150, rekuperadu 225 no kazu ativu hamutuk na’in 4.184.

Total komulativu kazu konfirmadu sura husi loron 21 fulan-Marsu tinan 2020 to’o loron 05 fulan-Setembru tinan 2021 hamutuk 17.618.

Entretantu, husi horseik (04/09) mai ohin, total teste PCR ne’ebé Laboratoriu Nasional Saúde halo iha Dili hamutuk na’in 133, kompostu husi Vijilansia sentinela na’in 18, Contact tracing na’in 10, Random Screening na’in 26, Viajen sai husi serka sanitaria husi Dili na’in 4 no follow up iha kuarentena na’in 73.

Teste PCR ne’ebé halo horseik iha Munisipiu sira seluk, RAEOA no HNGV hamutuk na’in 320.

Ohin, iha Izolamentu Vera Crus, Lahane, HNGV no fatin seluk iha teritoriu laran tomak, halo tratamentu hospitalizadu ba kazu detetadu positivu hamutuk na’in 95, kompostu husi kazu grave na’in 15, moderadu na’in 58 no leve na’in 22.