Enkuantu, iha Munisipiu Baucau iha kazu 24, Bobonaro 5, Covalima 4, Ermera 19, Lautem 10, Likisa 6, Manatuto 12, Manufahi 4 no Vikeke iha kazu 3.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, numeru kazu detetadu foun ohin menus kompara ho loron horseik. Nune’e mós kazu mate laiha.

“Husi totál kazu detetadu foun ohin, iha kazu 59 (30,1%) mak hatudu sintomas. Nune’e iha kazu na’in 40 mak simu ona vasina kompletu no na’in 14 (7%)  mak hetan ona vasina doze dahuluk,”dehan nia iha komunikadu ne’ebé Online INDEPENDENTE asesu, sesta ne’e.

Aleinde, SIJK mós ohin rejista pasiente ne’ebé rekupera husi moras Covid-19 hamutuk na’in 251.

Ho nune’e, kazu ativu ne’ebé  baixa iha Sala Izolamentu hamutuk na’in 4.429.

Totál komulativu kazu konfirmadu sura husi loron 21 fulan-Marsu tinan 2020 to’o loron 03 fulan-Setembru tinan 2021 hamutuk 17.379.

Entretantu, husi horiseik (02/09) mai ohin teste PCR ne'ebé Laboratóriu Nasionál Saúde halo iha Dili hamutuk 594, ne’ebé kompostu husi, Vijilánsia sentinela na’in 90, Contact tracing 155, Random Screening  84, Viájen sai husi serka sanitária husi Dili 175, Viájen internasionál  62 no Follow up iha kuarentena na’in 28.

Teste PCR ne’ebé halo horiseik (02/09) iha Munisipiu sira seluk, RAEOA no HNGV hamutuk 514.

Ohin, iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu hamutuk na’in 99 kompostu husi, kazu grave na’in 15, moderadu 55 no leve 29.

Tanba ne’e, SIJK apela ba populasaun sira atu kolabora no kontribui atu vírus SARS-CoV-2, inkui variante Delta, labele hada’et ba ema barak liután. Favor hela iha uma, bainhira lapresiza atu sai.

Asistente Editor: Saturnina da Costa