Hafoin hetan tebe, Ana (la’os naran loos), telefone ba nia maun-alin sira hodi hato’o keixa ba polisia. Ikus mai, Akas (la’os naran loos) tenke tama tribunal hodi tuir prosesu julgamentu.

Liu husi audensia julgamentu iha Tribunal Distrital Dili (TDD), Ministériu Públiku (MP) akuza Akas ne’ebé notifika hanesan arguidu komete iha krime Ofensas Integridade Fiziku Simples (OIFS) konjuze ho Violensia Domestika ne’ebé previstu iha artigu 145 husi kodigu Penal ho ameasa prizaun tinan ida (1) fulan neen (6).

Tuir azusaun husi MP, iha 22 Dezembru 2016 tuku 1:00 madrugada, Ana ne’ebé MP notifika hanesan lezada hasee arguidu ne’ebé maske kalan boot ona sei asesu Facebook.

“Komesa kria ona facebook nune’e la toba, halimar facebook to’o kalan boot,” hafoin ko’alia nune’e, lezada foti sumasu hodi tuda ba arguidu no kontinua rakut arguidu nia kabun. Arguidu ne’ebé nervozu tebe dala ida iha lezada nia hirus-matan.

Hatan ba akuzasaun ne’e arguidu hili nonok.

Iha fatin hanesan, lezada afirma katak, akuzasaun ne’ebé MP hato’o loos hotu.

“Iha momentu arguidu baku ne’e tanba ha’u hasee nia tanba halimar facebook,” dehan lezada iha TDD, Kinta (18/05).

Rona tiha deklarasaun ne’e, Tribunál husu ba MP atu submete kedas  ba alegasaun. Liu husi alegasaun MP husu tribunal fó pena prizaun tinan ida (1) fulan neen (6) suspende ba tinan rua (2) fulan ne’en (6).

Entretantu, husi parte defeza husu ba tribunal atu aplika pena ne’ebé adekuadu.

Tribunál adia julgamentu ba 30 Maiu 2017 hodi rona desizaun.