Tuir akuzasaun husi Ministériu Públiku, eis funsionariu Ministériu Saúde ne’e envolve krime Pekulatu no Falsifikasaun ne’ebé previstu iha artigu 295 no 303, reforsa ho artigu 35 númeru 1 Kodigu Penal Timor-Leste.
MP akuza, konsekunesia dereita no nesesariu husi arguidu nia hahalok ne’e estadu Timor-Leste hetan prejuizu $1.376.00.
Tuir akuzasaun MP, iha tinan 2013, Postu Saude Laulara hetan orsamentu $3.655.00 no tinan 2014 hetan tan $5.730.00. Orsamentu hirak ne’e atu implementa programa Serbisu Integradu Saude Komunitari (SISKA) hanesan selu insentivu ba Promotor Saude Familiar (PSF) no ba Xefi Suku ka Xefe Aldeia hodi fasilita mobilizasaun komunidade durante implementasaun programa ne’e.
Postu Laulara, MP dehan, rekruta mós pesoal balu hodi mobiliza komunidade sira tuir programa SISKA, kada pesoal PSF hetan insentivu variable, balun simu $5.00, $7.00, $9.00, no lider komunitariu sira hetan $10.00, kada fulan.
Iha tinan 2013 no 2014, MP akuza, arguidu inventa asinatura husi pesoal PSF no lider komunitariu sira hanesan, Maria de Oliveira de Jesus, Egas Ribeiro, João Virgillo Teles, Maria Guterres, Veronica da Silva no Agustinho Maria Araújo, Domingos Trazana Lourdes, Fatima da Costa Mota, Julio da Costa Romão no Matias Barreto, hodi kompleta nia relatoriu atu haruka ba Serbisu Saúde Aileu.
“Dokumentus hatudu katak arguidu obriga Maria de Oliveira de Jesus nudar limpezadór hodi tau nia asinatura iha resivu ho osan montanrte $700.00 ne’ebé tuir realidade Maria nunka partisipa iha programa SISKA no la simu osan refere,” dehan MP iha ninia akuzasaun.
MP hatutan, pagamentu ne’ebé halo ba Maria Oliveira de Jesus tuir resivu hala’o iha loron 30 Outobru 2014, 27 Novembru 2014, 30 Dezembru 2014, 27 Novembru 2014, 30 Dezembru 2014, 30 Outobru 2014, 27 Novembru 2014, 30 Outobru 2014, 27 Novembru 2014, 8 Janeiru 2014, 13 Janeiru 2014, 16 Janeiru 2014, no 22 Janeiru 2014.
“Resivu sira ne’e mensiona arguidu koloka kedas loron, fulan no tinan pagamentu nian, no entrega ba Maria Oliveira de Jesus, no tau nia asina dala ida de’it iha loron ida,” katak MP.
Aliende ne’e, arguidu mós halo falsifikasaun ba Filomeno Salsinha Martins nudar Responsavel Programa SISKA Postu Saude Laulara nian, hodi tau nia asintuta iha resivu ho data loron 30 Abril 2014, 30 Maiu 2014 no 30 Juñu 2014.
MP dehan, arguidu hatudu katak arguidu la halo pagamentu kompletu ba pesoal PSF no lider kominitariu sira hanesan Egas Ribeiro husi tinan 2013-2014 hamutuk $240.00, João Virgillo Teles la simu osan durante fulan sia iha tinan 2014 hamutuk $90.00, Ermelinda da Silva husi fulan Jullu to’o Dezembru 2014 ho osan $12.00, Maria Guterres husi fulan Juñu-Dezembro 2014 hamutuk $42.00.
“Arguidu obriga ema sira ne’e oinsa bele hatama relatoiu mai iha Nasionál, ida ne’e mak sai hanesan razaun ba arguidu hodi hamosu naran sira ne’ebé mak mensiona, ne’ebé sai hanesan kontratadu iha postu refere,” katak MP.
Tan ne’e, MP akuza arguidu hanesan autór material ho forma konsumadu iha konkursu real ba Krime Pekulatu no falsifikasaun.
Hatan ba akuzsaun ne’e arguidu deklara ba Tribunál katak, faktus ne’e balun loos no balun sala.
Nia dehan, kona-ba la selu kontratadu sira ne’e tanba pagamentu mak tarde.
“Iha ne’ebá ne’e osan atu sai ne’e fulan tolu-tolu mak foin sai dala ida de’it, sira la’os la selu, la’e, maibé pagamentu mak tarde,” dehan arguidu ba Tribunál.
Rona akuzasaun no deklarasaun ne’e, Tribunál adia julgamentu ba 19 Juñu 2017 hodi kontinua rona tesmuña.
Hanesan informasaun, programa Serbisu Integradu Saude Komunitari (SISKA) hanesan programa Ministeiru Saúde nian hodi fó tratamentu ba komunidade iha Timor-Leste ne’ebé hetan suporta husi Promotor Saude Familiar (PSF) no professional saúde husi Sentru Saúde Komunitariu (CSK). Atividade ne’e hala’o dala ida kada fulan no kobre teretoriu TL laran tomak.
Postu SISKA iha Sentru Saude Komunitaria Laulara kompostu husi suku lima; Fatisi, Madabeno, Tohometa, Talitu no Kota Lau.
Atividade SISKA hetan suporta husi fundu doadores liu husi Programa Governu ne’ebé hanaran Planu Estratejiku Seitor Saude, ho osamentu kada postu SISKA $35.00. Husi montante ne’e $25.00 entrega ba Promotor Saude Familiar (PSF) no $10.00 fó ba Xefi Suku no Xefi Aldeia hodi fasilita mobiliza komunidade sira.
