DILI:Membru Polisia Nasionál Timor-Leste (PNTL) ida husi Unidade Tranzito Roda Viaria, hetan agresaun fiziku husi membru FALINTIL-Forsa Defeza Timor-Leste (F-FDTL) tanba prende motor forsa ne’e nian iha area eskuadra Dom Aleixo Aimutin.
Komandante daruak PNTL Municipiu Dili, Superintendente Aisistente Eucelidis Belo konfesa katak agresun fiziku mosu duni entre forsa no polisia na’in rua ne’e tanba dezentendementu ba malu.
Maibé komandu sei hein hela informasaun detallu husi eskuadra Dom Aleixo inklui pesoal polisia ne’ebé hetan agresaun fiziku ne’e.
“Ita hotu iha lei nia okos, tuir artigu lubuk ida ne’ebé hakerek iha livru mean ne’e mak fó kompetensia ba polisia atu hala’o ninia servisu hodi kontrola atividade roda viaria nian iha dalan publiku,”dehan Komandante Eucelidis.
Nia esplika, polisia kontinua aplika prosedementu normais tuir lei kodígu estradas nian ba sese de’it mak komete iha infrasaun sei aplika tabela ba infrator sira.
Entertantu akontesementu ne’e mosu iha loron 14 Fevereiru 2018, bainhira Komandu Polisia Municipiu Dili liu husi eskuadra Dom Aleixo halo hela operasaun check point ho karater atu kontrolu ba transporte publiku-privadu, armas branca inklui motor kanu resin no laiha xapa matrikula.
Tuir Eucelidis katak, operasaun ne’e atu eduka sidadaun sira inklui membrus polisia, militar no funsioariu sira atu kontinua respeita kodígu estaradas.
Motorizadas husi forsa nian ne’ebe polisia prende iha ona komandu municipiu nia liman, no objeitu refere sei sai hanesan evidénsia ida bainhira proseus ne’e mak indika ba krimi sei aprejenta ba Ministériu Públiku.
