Tuir informasaun husi PNTL, maizumenus iha tuku 21.25, bainhira polisia halo hela pasarevista iha area Kolmera, konsege identifika joven na’in rua ne’ebé kondus motor lori hela rama ambon.
Mane na’in rua ho inisial TdS no GSL ne’e tula malu ho motor bebek kór ajul no laiha xapa matrikula.
TdS ne’ebé lori motor husi diresaun Komoro ba Palasiu Governu hakfodak bainhira haree polisia halo pasarevista no koko atu halai fila, maibé la konsege tanba nia tama ona klaran.
“Sira atu halai ba diresaun Merkadu Tais ka ba Motael mós la di’ak tanba polisia Forsa Rezerva sira hamriik taka dalan,” informa ajente polisia ida ne’ebé lakohi públika nia identidade ba jornalista jornál INDEPENDENTE, Tersa (04/12).
Tanba laiha ona alternativu seluk atu halai, TdS halai liu ba fatin polisia halo pasarevista no ikus mai nia ho nia kolega GSL hetan kapturasaun.
Pasarevista husi polisia ne’e envolve ekipa husi Polisia Tranzitu, Forsa Rezerva, no Batallaun Orden Públiku.
Bainhira identifika GSL sikat hela rama ambon iha kanotak, TdS hahú buka jeitu hodi ‘salva an’.
“Bainhira ami kaer suspeitu TdS dehan nia la hatene nia kolega lori rama ambon,” informa fonte husi polisia.
Tuir fonte ne’e, TdS hatete katak nia atu tula nia kolega GSL ba nia uma iha Bekora.
Iha fatin ketak, Komandante Daruak PNTL Munisipiu Dili, Superintendenti Asistente Euclides Belo, konfirma katak polisia halo duni kapturasaun ba suspeitu na’in rua ne’ebé lori rama ambon.
Euclides deskonfia suspeitu na’in rua ne’e nu’udar autór ba kazu hana ema iha Bairo-pite, Hudi-Laran iha Domingu (02/12) foin lalais.
“Ita deskonfia suspeitu rua ne’e iha relasaun ho kazu hana ema iha Hudi-Laran, Bairo-Pite nian. Tanba modelu karon fulun ne’e laiha diferensia, hanesan loos de’it,” informa Euclides.
Bazeia ba deskonfiansa ne’e, Euclides hatete, Polisia Servisu Investigasaun Kriminal (SIK) halo ona prosesu investigasaun atu kompleta auto-notisia hodi promove ba Ministériu Públiku.
Suspeitu na’in tenke kompleta oras 72 iha prizaun polisia Kaikoli hafoin sei aprejenta ba tribunal hodi hala’o prosesu interogatoriu dahuluk.
