Iha tinan 2016, arguidu NJ kria relasaun domin ho labarik feto ida ho idade tinan 14. Hafoin fulan hirak nia laran, arguidu hahú habrani an hodi husu ba nia doben atu hasoru-malu no lori malu ba fatin mamuk ida.

Arguidu ne’ebé hela iha Balide kontaktu nia doben ne’ebé hela iha Bairo-pite no kesi-lia atu hasoru-malu iha Mataduro.

Hafoin hasoru-malu iha Mataduro, feto ho mane ne’e konkorda-malu atu lori-malu ba feto nia tian nia uma, CS, ne’ebé iha altura ne’ebá mamuk, tanba ema ne’ebé hela sai hotu.

Hafoin halo relasaun seksual, NJ lori nia doben DM ba hein karreta, maibé tanba karreta laiha ona, sira deside hodi fila ba CS nia uma. Ho prezensa mane no feto ne’e, familia hahú lori ba kazu.

Ikus mai, prosesu ba kazu ne’e tenke tesi iha tribunal tanba familia husi mane no feto la konsege atu hetan solusaun ruma.

Iha ninia deklarasaun, DM hatete katak iha altura ne’ebá sira halo duni relasaun seksual, enkuantu NJ nega katak sira la halo relasaun seksual, maibé sira rei malu de’it.

Bazeia ba teste mediku husi ospital hatudu katak labarik feto ne’e halo ona relasaun seksual.

Entretantu, Ministériu Públiku akuza arguidu hanesan autor ba krime adevo seksual ne’ebé previstu iha artigu 177 kodigu penál, ho pena extraordinariu, ne’ebé bele hetan kastigu tinan 5 to’o tinan 20.

Maibé, tanba lezada mós kontribui hotu ba ‘relasaun seksual’ ne’e, tribunál hatun tinan 5 ba tinan 1 no tinan 20 ba tinan 13 fulan 1.

Ikus mai, liu husi audensia julgamentu ne’ebé hala’o iha Tribunal Munisipiu Dili (TMD) Sesta (30/11), tribunal deside hodi hamonu pena suspensaun tinan tolu ba arguidu NJ.

Audensia ne’e prezide husi juiz singular Edite Palmira, Ministériu Públiku reprezenta husi Prokuradór José Elu no arguidu hetan asistensia husi Defensór Públiku Sebastião.