Konteiner hirak ne’e oras ne’e daudaun sita hela iha Kuartél Jerál PNTL, Kaikoli, Dili.

Ai-moruk primária produsaun droga ne’e tula husi nasaun Xina ho ró, liu husi Singapura hodi tama mai territóriu Timor. Konteiner hirak ne’e tuir planu atu distribui tutan ba Indonézia ho fatin destinatáriu Sulawesi.

Jornalista sira tenta atu konfirma liután kazu ne’e ba Komandante Polisia Marítima, Superintendente Lino Saldanha, maibé la fó komentáriu.

Maski nune’e, deklarasaun ninian antes ne’e katak, ai-moruk ho tipu PCC ne’e kuandu kahur hamutuk ema ne'ebé konsumu sei sai hanesan zombie.

“Ema bele baku mate tiha mós nia hamriik la’o fali”, tenik nia.

Maski nune’e, ne’e foin mak tama iha espekulasaun polisia nian atu dudu ba prosesu investigasaun.

Tuir fonte konfirmadu balun hateten, konteiner sia ne’e la mai dala ida. Ró ne'ebé tula konteiner ho ai-moruk tipu droga tama dala tolu ona. Ikus mak hetan prende.

Konteiner sia ne’e mak la hetan buska, sasán sira ne’e sei haruka ba Indonézia ho ró ida naran Berkat Selayang. Tanba ne’e, ró ne’e tuir informasaun atraka iha tasi timor hahu kedas iha fulan ikus tinan 2017.

Konteiner sia ho ai-moruk PCC ne’e sei haruka ba Indonézia liu husi Kompañia PT Sehat Sejahtera, no sei destina ba fatin deskonfia ikus iha Sulawesi para atu kontinua halo produsaun.

Aleinde konteiner sira ne'ebé prende, PNSIK mós kaptura suspeitu na’in sia nu’udar sidadaun Indonézia para atu submete ba prosesu investigasaun.

Suspeitu sira ne’e inklui ema sira ne’ebé tuir ró ne’e inklui kapitaun ró no ró na’in ne’e rasik. Oras ne’e sira iha ona PNSIK nia liman hodi prosesa ba oin.