Segundu Komandante PNTL Munisípiu Dili, Superintendente Asistente Euclides Belo hateten, PNTL hamutuk PSIK kaptura eis-sekretáriu estadu Abílio Lima, iha ninia rezidénsia Ai-Mutin, Komoro, bazeia ba orden kapturasaun husi TDD.

Hafoin kaptura Polisia aprezenta ba Tribunál no akompaña too iha Prizaun Bekora.

Tuir desizaun Tribunál, kondenadu Abílio komete iha kazu abuzu de podér, pekulatu no korrupsaun ativa.

Kondenadu arguidu Abílio Lima tama prizaun Bekora tuku 09:00, tanba Tribunál Rekursu aplika pena prizaun tinan 3 efetivu.

Antes ne’e, Tribunál primeiru distánsia aplika o pena prizaun tinan 5 no selu indenizasaun ba estadu ho montante $5.300. Maibé, rekursu ba Tribunál Rekursu absolve arguidu Abílio Lima husi kazu ne’ebé antes ne’e Ministériu Públiku akuza ba nia.

Entretantu, Diretór Prizaun Bekora, João Domingos hateten, kondenadu Abílio Lima hetan mandadu detensaun husi Tribunál atu kumpre nia sentensa iha prizaun.

Nia dehan, agora daudauk ne’e nia prosesu tama ona, maibé atu koloka de'it ba fatin ne’ebé merese nia atu hela.