Ministériu Públiku akuza eis Vise Ministra Finansas ne’e ho krime abuzu pode no administrasaun nosa ne’ebé hatuur iha kodigu penal artigu 297 ho ameasa prizaun tinan ida to’o tinan haat.

“Depois de Ministériu Públiku analiza faktus no mós provas dokumentus ne’ebé konsta iha autus, liu-liu faktus ne’ebé produs iha durante audensia julgamentu, MP konklui katak arguida sira-nia konduta ne’e priense elementu objetivu no mós elementu subjetivu ba krime rua; abuze de Poder no administrasaun de Nosa,” deklara MP iha ninia akuzasaun finál durante julgamentu iha Tribunal Distrital Dili, Kuarta (19/09).

Tuir MP, faktus ne’ebé iha provadu hotu, bazeia ba deklarasaun husi arguida nian no sasin sira husi media sira hanesan Suara Timor Lorosa’e (STL), Timor Post, INDEPENDENTE, no Bussines Timor.

Tuir sasin sira katak sira simu duni karta husi Ministériu Finansas atu públika deklarasaun (eis) Ministra Finansas Emilia Pires iha 7 Agostu 2014, no ministériu finansas halo pagamentu ba públikasaun ne’e iha 16 Agostu 2014.

Enkuantu, parte defeza husi arguida husu ba Tribunál atu absolve arguida husi krime rua tanba konsidera faktus husi Ministériu Públiku la aprovadu hotu tanba la’os Vise Ministra mak halo pagamentu ba invoice sira ne’e.

Tuir defeza, arguida la fó prezuiju ba estadu hanesan ho akuzasaun husi Ministériu Públiku nian.

Rona deklarasaun husi parte rua Tribunál adia julgamentu ne’e ba 11 Outubru 2018 tuku 11:00 dader hodi rona leitura akordaun.