Iha akuzasaun Ministériu Públiku (MP), arguidu Alcino komete iha kazu naok motor haat, maibé tribunal haree katak kazu ida de’it mak provadu.

Pena prizaun ne’e fó bazeia ba kazu naok motor ne’ebé arguidu halo ba lezadu Kim Jeong Hoon. Iha prova hatudu katak arguidu ba DNTT hodi troka naran iha dokumentus motor nian.

Ba kazu sira seluk, tribunal la kondena arguidu tanba konsidera provas ne’ebé iha la sufisiente.

Molok ne’e, tuir akuzasaun husi MP, arguidu Alcino komete kazu naok motor tolu. Ba dahuluk akontese iha 27 Novembru 2008 iha area Surikmas.

Iha altura ne’ebá, iha tuku 04:00 madrugara bainhira udan monu-rai, arguidu ho nia kolega dezkoñesidu tama ba iha lezada Santina da Costa de Aráoju nia uma hodi naok motor ho marka Honda Supra Fit kór mean mean kombina ho metan ho númeru matrikula B.1725.

Kazu daruak akontese iha 2009, Alcino foti lezadu Kim Jeong Hoon nia motor ho xapa matrikula A.9806 TLS.

Hafoin foti motor ne’e, arguidu hakat ba DNTT hodi rejistu no troka naran ho razaun nia dokumentus lakon dezde 8 Abril 2009.

Kazu tuir mai, iha 3 Setembru 2011, lezadu Salvadór Monteiro da Silva aprezenta keixa ba polisia kona-ba nia motor marka Honda MCR ho xapa matrikula B.2810 ne’ebé lakon iha nia uma.

Polisia konsege hetan no prende motór ne’e husi arguidu Alcino ninia uma.

Ba kazu ikus liu, MP akuza, akontese iha 12 Agostu 2011. Iha altura ne’ebá, Alcino tama ba lezadu Mateus de Almeida Aráoju nia uma hodi naok motor ida ho marka Honda Mega Pro kór metan ho xapa matrikula A.9672 TLS.

Tuir MP, arguidu Alcino sai hanesan autór material ho forma konsumadu iha krime 4 furtu agravadu bazeia ba artigu 252 kodigu penal.

Ba akuzasaun ne’e, arguidu Alcino rekuza no hatete la loos.

“Derrepente de’it polisia bolu ha’u ba mak hatudu naran mai ha’u, ha’u dehan motor ne’e ha’u laiha koñesimentu, i depois motor la’os ha’u mak foti,” dehan Alcino durante julgamentu.

Maske nega akuzasaun ne’ebé iha, maibé ikus mai tribunal deside hodi hatama Alcino ba kadeia hodi responsabiliza hahalok ne’ebé nia halo ona.