Lori Samurai ba Kampus, Polisia Kaer Kandidatu Estudante 2 Featured

By Tome Amando Janeiru 29, 2019 5474
Ilustrasaun Polisia Kaptura ema. FOTO: Jawa Pos Ilustrasaun Polisia Kaptura ema. FOTO: Jawa Pos

DILI: Polisia Nasionál Timor Leste (PNTL) kaer kandidatu estudante na’in rua ho inisial BB no MMX ne’ebé lori samurai ba area kampus Universidade Nasionál Timor Lorosa’e (UNTL) iha Segunda (28/01).

Aleinde sikat samurai iha kotuk-laran, kandidatu estudante na’in rua ne’e mós lori fiska no besi beton ne’ebé tesi badak.

Tuir informasaun, kandidatu estudante universitariu na’in rua ne’e halo asaun ne’e relasiona ho kazu konfrontu entre estudante ne’ebé akontese iha Sesta (25/01).

Komandante Daruak PNTL Munsipiu Dili, Superintendenti Asistente Euclides Belo informa, polisia hetan informasaun husi akademiku balun katak iha kandidatu estudante na’in rua halo hela check point ba estudante sira seluk tanba kazu ne’ebé akontese iha Sesta foin lalais.

“Ami-nia membru efetivu sira tuun kedas ba terenu hodi halo operasaun iha kampus akademiku UNTL nian. Ami hetan duni ema na’in rua ne’e sikat hela samurai iha kotuk,” informa Euclides ba jornalista sira iha edifisiu komando Polisia Kaikoli, Dili, horisehik.

Hafoin identifika, Euclides hatutan, polisia halo kedas emuskada hodi taka fatin importante sira atu suspeitu na’in rua ne’e labele sai husi areador kampus UNTL nian, hafoin polisia kaptura suspeitu sira iha jardin Fakuldade Ekonomia.

Daudauk ne’e, suspeitu na’in rua iha hela sela detensaun PNTL Munisipiu Dili hodi hein prosesu tuir mai.

Entretantu, iha Sesta foin lalais, mosu konfrontu entre estudante sira iha area UNTL bainhira sira ba haree naran estudante ne’ebé konsege pasa hodi tama iha UNTL.

Husi konfrontu ne’e, estudante na’in rua hetan kanek.

Kazu dahuluk akontese iha tuku 12:00 meudia. Estudante ida ne’ebé identifika ho naran Ade hetan tuda no baku hafoin halo konfirmasaun ba naran ne’ebé taka iha UNTL.

“Vitima sai ho nia kolega sira husi portaun prinsipal UNTL, derrepente de’it grupu dezkoñesidu ne’ebé deskonfia kandidatu estudante UNTL halo asaltu. Sira lori fatuk tuda kona vitima nia ulun parte loos. Vitima monu ba rai no suspeitu sira tuku, tebe nia,” informa Euclides.

Kazu daruak mosu iha loraik tuku 14:15. Kandidatu estudante ho naran Joanico Fernandes Ribeiro hetan sona iha parte kabun iha area Fakuldade Ekonomia, besik edifisiu CAMS-TL.

“Polisia halo kedan intervensaun maibé la konsege kaptura suspeitu,” dehan nia.

Jornalista jornal INDEPENDENTE koko konfirma asuntu ne’e ho parte UNTL, maibé irarkia UNTL seidauk prontu atu fó informasaun.

 

Rate this item
(0 votes)

Independente Digital TV