Iha semana kotuk, mosu kazu konfrontu iha Rai-kotu ne’ebé deskonfia komete husi grupu artemarsiais. Iha Fatuhada mosu mós konfrontu entre joven, no iha Kaikoli, polisia kaptura joven na’in 7 ba akuzasaun tentativa oho ema (omesidu).
Tuir mai jornal INDEPENDENTE fó sai informasaun husi parte Polisia Nasionál Timor Leste (PNTL) Munisipiu Dili kona-ba konfrontu hirak ne’e.
Konfrontu Grupu Artemarsisias iha Rai-Kotu
Iha Sabadu (02/02) maizumenus tuku 21:00 kaptura ema na’in rua ho inisial ACM (20) no JMF (21) iha Golgota, Rai Kotu, Suku Komoro hafoin mosu konfrontu ne’ebé deskonfia halo husi grupu Artemarsiais.
Komandante Daruak PNTL Dili, Superintendenti Asistente Euclides Belo hatete, polisia kaptura suspeitu na’in rua ne’e bainhira halo operasaun ba konfrontu iha fatin refere. Bainhira polisia kaer, suspeitu na’in rua ne’e lori uniforme organizasaun artemarisias no lori tudik.
“Ita (polisia) kaptura sira iha kedas fatin akontesimentu. Ita hetan farda no tudik mak sira na’in rua uza hodi asalta malu,” informa Euclides ba jornalista sira iha edifisiu Komando Polisia Dili, Kaikoli, Segunda (04/02).
Konfronto iha eis Merkadu Komoro, Ida Kanek
Iha parte seluk, mosu konfrontu entre komunidade husi aldeia 03 no 05, eis merkadu Komoro, suku Fatuhada ne’ebé rezulta joven ida, Mario da Silva Saldainha (19), hetan kanek.
Konfrontu entre aldeia rua ne’e mosu iha Sabadu (02/02) maizumenus tuku 22.15 kalan.
Tuir informasaun, vitima hetan ta’a husi ema na’in rua ho inisial MF (20) no DTF (16).
Komandante Daruak PNTL Dili, Superintendenti Asistente Euclides Belo hatete, MF no DTF envolve iha kazu tentativa oho tanba uza sasan kroat atu hakotu vitima nia vida.
“Ami haree vitima ho kondisaun kanek todan iha ninia kabas parte loos. Ami hetan apoiu husi KPK halo kedas kapturasaun ba suspeitu,” informa Euclides.
Iha loron hanesan, Euclides hatutan, polisia mós kaptura tan suspeitu ida ho inisial IFA (28) husi aldeia 03 ne’ebé aproveita situasaun hodi estraga ema seluk nia propriadade, inklui foti ema ninia sasan iha loja.
Ta’a Ema iha Kaikoli
Entretantu, Polisia halo kapturasaun ba suspeitu na’in rua ho inisial LPB (28) no AMC ne’ebé deskonfia ta’a kanek vitima Charles Marlin Exposto iha Suku Kaikoli iha Sabadu (02/02).
“Ita detein sira iha Sabadu. Bainhira sira kompleta ona oras 72 mak foin aprejenta ba Tribunal hodi prosesa tuir lei ne’ebé vigora”, informa Euclides.
