“Ha’u hakarak hatete de’it ne’e la’os pistol tebes maibé pistola brinquedos (halimar),” deklara Komisariu Julio ba jornalista sira iha Kuartel Unidade Espesial Polisia, Kinta (05/04).

Tan ne’e, nia husu ba media atu labele ansi halo publikasaun no tenke justifika uluk tanba públikasaun ne’e bele halo povu sira trauma.

“Klaru ninia modelu pistola maibé ne’e brinquedos ne’ebé labarik sira uza hodi halimar. La halo mate ema ida tanba la uza musan tebes. Ninia musan ne’e ki’ik hanesan foremungu musan. Horisehik PSIC lori ba ha’u-nia fatin, ha’u haree duni,” dehan nia.

Ba suspeitu JB, Komando PNTL liu husi Polisia Servisu Investigasaun Kriminal (PSIK) entrega ba komando polisia Munisipiu Maliana iha 4 Abril kalan maizumenus tuku 09.15 tanba fatin ne’ebé mak PM sira halo kapturasaun tama iha area juridiku komando refere.

PSIK nasional liu husi autorizasaun Komando Jeral entrega ona JB atu prosesa iha Tribunal Distrital Suai.

Tuir informasaun, JB nu’udar komunidade ida husi munisipiu Ermera ne’ebé durante ne’e iha ligasaun di’ak ho sidadaun Indonezia sira iha Atambua. Nia sempre tama-sai fronteira rai-maran hodi hala’o ninia aktividade illegal.

Polisia Militar (PM) halo kapturasaun ba mane ida ho inisial JB ne’ebé deskonfia hatama pistola rua husi fronteira mai Timor Leste.

Tuir informasaun, PM kaptura JB ne’ebé hatama pistola rua ho marka M 84323 iha area Manduki iha 3 Abril maizumenus tuku 10.20 OTL.