“Situasaun iha Maliana ne’e horisehik ((Tersa (7/8)) kedas ha'u haruka detein ona Komandante Kapitaun ne’ebé Komanda sira Tunubibi. Agora iha ona sela polísia militár normalmente 72 oras”, dehan Xefe Estadu Maiór Jenerál, Majór Jenerál Lere Anan Timur, iha Palasiu Prezidensiál, Bairru-Pité, horisehik.
Hafoin prosesu ne’e remata komandante ne’e tenke responsabiliza, tanba dehan polisia no forsa lanu hodi ameasa tiru malu. Tanba ne’e, labele admite iha instituisaun to’o própria regra militár ninia.
Nia esplika, primeiru, militár labele hemu tua lanu bainhira hatais farda, segundu, se la hatais farda mós ne’e reprezenta nafatin instituisaun. Tanba ne’e maka grave, tiru sala ona, lanu mós sala. Ne’e duni, sira sala ne’e tenke responsabiliza.
Nune’e instituisaun interna ida-idak mós halo ninia atu to’o verdade se maka sala no se maka loos. Dala barak Timór hakarak defende malu, sala mós dehan loos ka loos mós dehan sala fali, ne’e maka sei buka evita.
Nia hatutan, Timor hotu-hotu hakarak buka naran atu aat ka di'ak. Tanba ne’e di’ak liu presiza halo revolusaun mentál, labele lori interese liu fali interese Estadu ka nasaun ninia.
Relasiona ho akontesimentu iha Maliana, Xefe Estadu Maiór F-FDTL, Majór Jenerál Lere Anan Timur, husu deskulpa ba komunidade sira ho hahalok ne’ebé membru sira halo.
“Ha’u nu’udar Komandante ha’u husu deskulpa ba ita nia komunidade, la'ós ema seluk maka komete sala maibé imi nia oan sira maka halo sala. Ami sei buka hanorin, eduka atu sai oan ne’ebé di’ak, militár di'ak no militár ne’ebé profisionál”, tenik nia.
Nia esplika, depois Prezidente Repúblika rona informasaun ne’e no husu ba Lere kona-ba situasaun forsa armada iha Maliana ne’ebé ema hotu-hotu ko’alia.
Eis-gerrilleiru ne’e dehan, preokupasaun ema hotu nia kona-ba F-FDTL no PNTL tiru malu iha Maliana ne’e la loos. Bainhira tiru malu ona tenke iha mate. Agora mate no kanek de’it mós laiha entaun ida ne’e la tiru malu.
Kazu ne’ebé akontese iha Maliana ne’e membru sira husi instituisaun rua ne’e halo de’it jeitu atu hata'uk de’it ema.
Entaun situasaun ne’ebé boot la'ós ameasa, maibé laiha duvida katak situasaun iha Maliana bele halo populasaun ta'uk.
