Aleinde investigasaun kriminal, Komisariu Julio dehan, parte interna polisia mós hala’o prosesu disiplinar ba ninia membru ne’e.

“Kazu ida Bidau Mota Klaran ne’ebé ajente ida tama igreja rasta ninia segunda feen ka saida ne’e hodi lori ekipamentu seguransa nian ne’e prosesu investigasaun kriminál la’o ona, prosesu disiplinar mós la’o tiha ona imediatamente. Ne’ebé laiha ema ida sees husi prosesu, ida ne’e mak informasaun ba Komandu,” deklara Júlio hafoin enkontru semanál ho Prezidente Repúblika Francisco Guterres Lu Olo iha palasiu Prezidensiál Bairu-Pite, Dili, Kinta (09/08).

Molok ne’e, iha Domingu (05/08), pesoal polisia ida ho diviza ajente tama ba Igreja iha Bidau Mota Klaran ho kondisaun lanu.

Bainhira hamriik iha Igreja laran, nia karega pistola ne’ebé nia lori no hakilar atu padre ne’ebé dirije misa ne’e para misa.

Tanba lakohi atu buat at balun mosu iha igreja laran, padre ne’ebé dirize misa deside hodi hapara misa no haruka sarani sira fila ba ida-idak nia uma.

Hafoin simu informasaun ne’e, Komandante Jeral Polisia Nasionál Timor Leste (PNTL), Komisariu Julio da Costa Hornai, foti kedan desizaun.

Komisariu hatuun despaixu ba Departamentu Justisa PNTL hodi dezarma pesoal ne’e.

“Ohin (horisehik) ha’u haruka bolu ona ajente ne’e mai no ha’u halo ona despaixu ba Departemetu Justisa PNTL nian hodi dezarma par halo prosesu investigasaun,” deklara Komandante Jeral PNTL, Komisariu Julio da Costa Hornai iha Kuartel Jeral, Kaikoli, Segunda (06/08).

Tuir informasaun ne’ebé simu, Komandante ne’e hatete, ajente ne’e lanu todan hodi tama ba igreja no hapara selebrasaun eukaristia ne’ebe la’o hela.

Hafoin simu informasaun, nia dehan, Komando haruka ekipa tuun ba hodi buka ajente ne’e maibé ajente ne’e halai tiha.

“Ita lalika halimar demais ho ajneiras no pork*** ne’ebé mak membru ne’e halo iha igreja laran,” dehan nia.