Liu husi julgamentu iha Tribunal Distrital Dili (TDD), Kinta (16/02), Ministériu Públiku akuza arguidu halo agresaun fiziku hasoru nia fen Ermelita.

Tuir kronolojia ne’ebé MP lee sai katak, iha fulan Fevereiru 2016, tuku 8:00 kalan, bainhira lezada converse hela ho nia bin, arguidu tama uma laran no bolu lezada, hafoin baku lezada nia ulun no kotuk laran.

Tuir akuzasaun ne’e, arguidu halo ona agresaun fiziku hasoru lezada dala 7. Arguidu ho lezada moris hamutuk nudar fen ho laen iha tinan 2000.

MP akuza katak, agresaun fiziku hasoru lezada hahú akontese iha tinan 2001, no kontinua iha tinan 2002, 2004, 2005, 2007, 2008, 2014 no ikus liu iha 2016.

Iha 2007, bainhira lezada husu osan atu atende nesesidade uma-lara,  arguidu foti kafé manas hodi fakar ba lezada nia isin lolon, no 2008, molok arguidu ba Irlandia hodi serbisu, arguidu fakar bee foer iha basia boot ba lezada.

MP konsidera hahalok husi arguidu hanesan violensia domestika ho natureza maustratus ho pena prizaun tinan 5.

Rona akuzasaun ne’e arguidu deklara katak, faktus ne’e balun loos no balun sala.

Tuir arguidu, nia nunka baku no basa lezada, maibé tolok de’it lezada, tanba bainhira nia fila husi Irlandia rona husi nia aman katak lezada selingkuh ho mane seluk hodi lori mai iha sira-nia uma.

“Ha’u rasik mós haree ho matan. Ha’u dehan (ba lezada) se Ó hakarak mane seluk, di’ak liu kaben de’it ona no husik ha’u ho labarik na’in tolu, atu nune’e ami mós bele hakmatek iha fatin,” dehan arguidu ba Tribunál.

Iha fatin hanesan lezada rezeita deklarasaun husi arguidu.

“Durante nia iha Irlandia ha’u nunka selingkuh ho mane seluk. Arguidu mak deskonfia ba-mai. Dezde ami hola-malu arguidu sempre baku hela de’it ha’u, maibé ha’u lakohi atu hato’o keisa polisia tanba problema  uma-laran,” katak nia.

Tuir Ermelita katak, arguidu halai ba Irlandia iha tinan 2008 tanba de’it problema uma-laran.

Nia rekoñese, durante iha Irlandia kada fulan arguidu sempre haruka osan mai.

Lezada dehan, nia hanoin bainhira fila husi Irlandia arguidu muda ona nia hahalok, maibé realidade bainhira fila iha tinan 2014 arguidu kontinua ho nia hahalok ne’e.

Ho arguidu ninia hahalok ne’e, lezada dehan, maske sei hela iha uma ida maibé daudauk ne’e sira toba ketketak (pisah ranjang).

Tribunál adia prosesu julgamentu ba loron 13 Marsu tinan 2017 hodi rona testamuña sira.

Audensia julgamentu ne’e prezide husi Juiz Koletivu Zumiaty Freitas, Antonio do Carmo, no Albertina Neves. Ministériu Públku reprezenta husi Prokurdóra Ivonia Guterres, no arguidu hetan asistensia legal husi Defensór Públiku João Carvailho.