Liu husi julgamentu iha Tribunal Distrital Dili (TDD), Segunda (27/03), Ministériu Públiku hasai akuzasaun katak, iha 17 Maiu 2014, bainhira Ape ne’ebé fila husi viasakra, Ado ho nia kolega na’in neen (6) ne’ebé hamriik hela iha Hotel Arbiru nia oin konsidera Ape sadik sira.
“Arguidu dehan ba lezadu, Ó sadik ha’u ga? arguidu halai tuir lezadu, tebe lezadu nia liman parte sorin, arguidu mós kontinua hasai tudik sona lezadu nia kotuk dala ida,” deklara MP iha ninia akuzasaun.
Konsekunsia husi arguida nia hahalok ne’e, MP dehan, lezadu hetan kanek iha liman no kotuk laran ne’ebé suku pontu haat (4), no lezadu tama Ospital hodi halo tratamentu durante semana ida ho balun.
Ministériu Públiku akuza arguidu sai hanesan ko-autór ba material krime ofensas integridade fiziku simples tuir artigu 145 kodigu penal Timor-Leste.
Hatan ba akuzasaun ne’e, arguidu deklara ba Tribunál katak, faktus ne’e loos hotu.
Iha momentu ne’eba, arguidu dehan, nia laiha intensaun atu sona lezadu, maibé tanba lezadu mak provoka uluk halo arguidu nervozu hodi sona lezadu no tebe iha nia liman parte karuk.
“Ami na’in 6 mak hamrik hamutuk iha Hotel Arbiru nia oin, maibé ha’u mak direitamente sona lezadu,” dehan arguidu ba Tribunál.
Iha fatin hanesan, lezadu dehan, iha altura ne’eba lezadu ho nia kolega sira lao barak maibé lezadu mak lao ikus, derepente de’it arguidu hakilar ba lezadu.
“Depois mak nia halai tuir ha’u, tebe iha ha’u-nia liman depois hasai tudik husi kanotak hodi sona ha’u nia kotuk laran,” katak lezadu.
Rona husi parte hirak ne’e, Tribunál husu ba Ministériu Públiku atu submete ba alegasaun. Iha alegasaun MP husu ba Tribunál atu aplika pena prizaun tinan 3 suspende ba tinan 6.
Entretantu husi Defensór husu ba Tribunál atu aplika pena ne’ebé mak adekuadu tanba arguidu arrepende ona nia sala no iha futuru sei la halo tan.
Tribunál deside hodi adia julgamentu ba 17 Abril 2017 tuku 5:00 loraik hodi rona desizaun final.
Audensia Julgamentu ne’e prezide husi Juiza Singular Zulmira Auxiliadóra, MP reprezenta husi Prokuradór Nelson Carvailho, no arguidu hetan asistensia legal husi Defensora Públika Agustinha de Oliveira.
