Tito ne’ebé sente nia feen la rona ona nia no la konsidera nia, tanba soe dose ne’ebé nia sosa, hahú nervozu no baku Ita.

Tuir akuzasaun husi Ministériu Públiku ne’ebé mak Tribunál lee sai katak, iha 11 Novembru 2015 tuku 8 kalan iha 30 Agostu, arguidu (Tito) ho lezada (Ita) foin fila husi sira-nia tinan nia uma iha Bebonuk hafoin ba foti modo.

Iha altura ne’e, lezada husu ba arguidu atu fila fali ba sira-nia tian tanba kalan ona, maibé arguidu lakohi. Tanba sente stomogu hahú moras, lezada husu ba arguidu sosa dose atu nia han no arguidu sosa hodi fó ba lezada.

Hafoin simu dose ne’e, lezada haan tutuir dalan, maibé arguidu bandu atu lezada labele haan dose tuir dalan.

“Tanba ne’e mak lezada nervozu hodi so’e dose ne’e. Arguidu haree ida ne’e ho nervozu ba baku lezada. Arguidu basa lezada nia hasan dala ida, tuku iha liman sikun parte karuk. Arguidu kontinua tuku nafatin lezada nia kotuk laran,” deklara MP iha ninia akuzasaun liu husi audensia julgamentu iha TDD, Sesta (21/04).

Ministériu Públiku akuza arguidu sai hanesan autór material ba krime ofensas integridade fiziku simples kojuze ho krime violensia domestika ne’ebe previstu iha artigu 145 kodigu penal Timor-Leste.

Hatan ba akuzasaun ne’e  arguidu deklara katak, faktus ne’e loos hotu. Nia basa duni lezada tanba haan iha estrada públiku.

Arguidu hatete, nia nervozu tanba hafoin nia koalia labele haan dose iha dalan, lezada soe dose.

“Se Ó lakohi haan, kaer par fó ba alin sira iha uma,” dehan Tito hodi hasara nia lia-fuan.

Iha fatin hanesan, lezada dehan, arguidu basa uluk nia hasan, hafoin lezada halai mak arguidu halai tuir hodi tebe iha kotuk-laran maibé la kona, entaun arguidu rasta fali lezada nia fu’uk hodi monu tun ba rai no arguidu tur iha lezada nia leten hodi tuku dala-barak iha nia isin.

“Nia baku ha’u dezmaia tiha mak foin para karreta hodi tula ba uma. Iha ha’u-nia isin lolon sente moras hotu,” dehan lezada ba Tribunal.

Liu husi alegasun Ministériu Públiku husu ba Tribunal atu aplika pena prizaun tinan 1 suspende ba tinan rua. Entretantu Defensór Públiku  husu Tribunál aplika pena ne’ebé adekaudu tanba durante ne’e arguidu mak fó haan ba sira-nia oan no nia feen no oras ne’e dadauk arguidu mós arenpende ona nia sala.

Rona ida ne’e, Tribunál adia julgamentu ne’e ba 4 Maiu 2017 tuku 5:30 loraik hodi rona desizaun final.