Tuir akuzasaun husi Ministériu Públiku ne’ebé lee sai iha Tribunal Distrital Dili (TDD) katak kazu ne’e akontese iha 17 Novembru 2015 tuku 7 kalan iha Surikmas, hafoin kazu asalta malu entre joven sira tanba joga bola.
MP akuza arguidu sai haesan autór material ba krime obstrusaun ba autoridade públiku tuir artigu 243 kodigu penal Timor-Leste.
“Ema ne’ebé mak ho violensia ka ameansa grave hasoru funsionariu ka forsa militar ka polisia nia ajente, la husik nia pratika aktu kona-ba nia funsaun ka halo pratika hasoru nia dever sei hetan pena prizaun tinan rua (2) to’o tinan neen (6).
Hatan ba akuzasau ne’e, arguidu deklara katak, nia laiha intensaun atu sona lezadu, iha momentu ne’eba arguidu lori duni tudik tanba foin haan has nune’e tudik ne’e nia sikat hela iha bolsu kotuk.
“Iha momentu ne’e ha’u la koñese lezadu katak nia (membru) PNTL, derependete de’it lezadu tuku dala tolu (3) iha ha’u-nia hasan, depois mak ami nain rua haksesuk malu no nia fihir ha’u mak ha’u dehan Ó leki ka, ne’e mak lezadu hasai pistola hodi tiru ha’u nia ain, depois bala musan ne’e kona tan ba Xefe Aldeia nia husar,” dehan arguidu.
Iha fatin hanesan, lezadu Gastão rezeita. Nia dehan, nia baku arguidu nia kaba’as dala rua tanba arguidu dehan ba nia atu labele mete labarik sira nia problema.
“Ha’u ba bolu Xefe Aldeia atu rezolve problema ne’e, maibé arguidu dehan labarik sira-nia problema ita-boot labele mete, tanba ne’e ha’u baku nia kabas dala rua, ha’u dehan Ó tuur tiha, maibé arguidu hasai tudik hodi sona ha’u-nia kabas dala ida,” hatete lezadu.
Tanba sente moras, lezadu dehan, nia hasai pistola hodi tiru sa’e ba leten hafoin tiru ba aspal nune’e bala musan ne’ebé kona aspal rahun kona argudu no Xefe Suku.
Rona deklarasaun ne’e, Tribunál adia fali julgamentu ba 17 Marsu 2017 tuku 11:30 dader hodi rona deklarasaun husi testamuña.
Audensia julgamentu ne’e prezide husi Juiz Koletivu José Maria de Aróujo, Maria Solana, no Francisca Cabral. MP reprezenta husi Prokuradór Gustavo, no arguidu hetan asistensia legal husi Defensór Públiku Sergio Dias Quintas.
