Juiz Prosesu Ivan Antonio hatete, tuir lei bainhira arguidu, lezada ka testamuña la marka prezensa Tribunál sei adia julgamentu ba loron seluk.
Iha kazu fa’an kupon ne’e, arguidu na’in lima (5) mak envolve hanesan; arguidu Isau Perreira, Mariano Perreira, Gil da Silva, Alvaro da Silva dos Reis, no Nelson Viegas.
Ministériu Públiku akuza arguidu na’in 5 ne’e komete krime reseptasaun tuir artigu 272 kodigu penal Timor-Leste.
Tuir akuzasaun husi MP, iha 5 Marsu 2015 tuku 9:30 dader, Polisia Servisu Investigasaun Kriminál Nasionál (PSIKN) hetan arguidu na’in 3 uza kupon mina estadu nian ho valor $80 hodi ense mina ba karreta privadu iha Ruvic Fuel.
Kupon mina ne’e pertense ba Ministériu Solidariedade Sosial no Ministériu Edukasaun.
Arguidu na’in rua (2) seluk, Isau Perreira no arguidu Alvaro da Silva dos Reis nudar trabalhadór iha kompaña Ruvic fuel hetan akuzasaun envolve iha krime pekulatu tuir artigu 295 kodiku penal Timor-Leste, tanba arguidu na’in 2 ne’e mak faan mina.
