Tuir Ministru Planeamentu Investimentu Estratéjiku  (MPIE), Kay Rala  Xanana   Gusmão dehan, governu asina tiha ona akordu ho Kompañia SDV Internasionál hodi aloka orsamentu tokon para hari Portu Tibar.

Nia dehan, Portu Tibar ho ninia kapasidade boot no luan sei simu hotu ró boboot atu ba para no hatún sasán.

Xanana dehan, iha PEDN define ona sei muda Portu Tibar ba Hare too tinan 2020 ba sei muda Portu Dili-Kolmera nakfila ba Dili Refinaria.

Bainhira Portu Tibar halo remata, Ró Nakroma I no Nakroma II inklui ró lubuk ida sei ba para hotu iha ne’ebá.

“Ita hare problema barak maka mosu iha Portu Dili  ne’ebá, problema sira ne’e halo ita nia ekonomia tun, dala ruma ita haree ró sira mai para rungu-ranga iha tasi laran ne’ebá. Ita hanesan fali sidade ida iha tasi laran, ho problema sira ne’e maka governu halo desizaun ba halo Portu Tibar ida ne'ebé boot, no modernu ita bele dehan Portu ne’e sei sai hanesan zona industriál,” dehan Xanana ba jornalista iha salaun enkontru Ministériu Finansas, Kinta (26/01).

Eis PM ne’e rekoñese, problema lubuk ida sei mosu nafatin iha Portu Dili, tanba kapasidade portu ne’e ki'ik tebes no iha tempu loron boot ruma, ró para hein malu atu hatún sasán.

Nia dehan, agora daudauk governu kontinua konsulta hela ho Kompañia SDV hodi haree progresu servisu atu implementa projetu Portu Tibar.

Tuir polítika governu nian, Portu Tibar bele hahú harii ona  hodi too iha Outubru 2020 bele halo remata ona.

Iha primeiru fase konstrusaun Portu Tibar, governu tau nia osan 40%  ho valor Tokon $1.20 no Kompañia SDV tau osan Tokon $1.49.

Iha faze segundu bele aumenta tan osan tokon $500  ne’ebé governu no kompañia sei investe hamutuk hodi halo manutensaun ba portu ne’e too tinan 30.

Sei Muda Sai Komunidade Tibar

Kona-ba komunidade sira ne’ebé hela besik Portu ne’e governu sei muda sira sai no fó apoiu osan tuir kondisaun.

Xanana dehan, komunidade Tibar ne’ebé lakohi fó rai hodi governu halo dezenvolvimentu di’ak liu koopera.

“Agora ita atu ba duni komunidade sira ladi'ak. Tanba ita terra livre, povu livre entaun ita susar atu dezenvolve ita mate ona, mais atu informa ba imi komunidade sira iha ne’ebá balun hahú sai daudauk ona, fatin ne’e husik mós atu nune’e ikus mai fatin ne’e sei sai zona industriál,”tenik nia.

Too notísia ne’e hatún, Jornál INDEPENDENTE tenta konforma ho Reprezenta SDV Internasionál iha Timor-Leste, Rafael Ribeiro, maibé seidauk hetan konfirmasaun klaru.