Xefe Ezekutivu Empreza Kmanek, Clarence Lim hateten, iha tinan neen liubá sira halo kréditu iha banku balun, maibé tanba seidauk selu hikas hotu entaun banku deside hodi la fó kréditu no osan inan ne’ebé kuda iha ne’ebá labele fó fila hodi hein to’o selu hotu kréditu ne'ebé iha.
Nia dehan, problema ne’ebé empreza ne’e hasoru maka tenke selu osan kréditu iha banku ho montante kuaze tokon $1 liu.
“Ida ne’e mak hamate loloos ne’e, la'ós tanba situasaun ekonomia. Ida ne'e mak ha'u hakarak klarifika ba ema hotu”, dehan Xefe Ezekutivu Empreza Kmanek, Clarence Lim, iha knaar fatin, Hudi-Laran, horisehik.
Ne’e duni, Clarence dehan, desizaun hodi taka provizóriu atividade negósiu ne’e nia foti hafoin konsulta kle'an ho nia espoza no família inklui kolega empreza sira.
“Ami presiza haree fali opsaun ruma, atu re-finansia fali hanesan saída mak ami halo hela ne’e. Ami ko'alia ona ba Banco Nacional Ultramarino (BNU) no ba doadór seluk ruma hodi bele fó tulun. Opsaun seluk maka atu fa'an hikas Kmanek nu’udar pakote ida”, dehan nia.
Nia dehan, agora atividade negósiu taka provizóriu hodi hein opsaun seluk atu fa’an asaun Kmanek ba emprezáriu balun bele sosa hodi kontinua investe nafatin atividade negósiu. Opsaun seluk tan mak sei re-finansia depois husi tulun ba BNU hodi fó kréditu ba sira.
Entretantu, Diretór Ezekutivu Servisu Rejistu no Verifikasaun Emprezariál (SERVE), Florêncio Sanches hateten, sira seidauk simu pedidu husi Kompañia Kmanek hodi taka sira ninia atividade ekonómiku.
“SERVE seidauk simu pedidu husi kmanek, maibé ha'u rona ona sira atu taka”, dehan nia.
Tuir lista SERVE simu ona pedidu husi kompañia hamutuk rihun ida atu taka empreza, maibé hafoin rona esplikasaun husi SERVE ikus mai empreza 94 maka taka.
