DILI:Movimentu Asukai Lorosa’e (MAL) nu’udar organizasaun da masa ne’ebé mai husi membru nivel intelektuál, veteranu, antigu kombatente, juventude, estudante universitáriu lamentasaun kona-ba orsamentu ne’ebé aloka ba setór tolu hanesan setór edukasaun, agrikultura no saúde ne’ebé ki'ik.

“Husu Estadu atu hataan uluk nesesidade povu iha tempu badak, envezde halo investimentu ba projetu sira iha tempu naruk, hanesan sosa asaun ConocoPhillips no Shell ne’ebé nia retornu sei iha inserteza nia laran”, dehan Prezidente MAL, Justino Ximenes, hafoin suru-mutu ho Prezidente Repúblika, iha Palasiu Prezidensiál, Bairru-Pité, horisehik.

Hataan ba preokupasaun MAL nian, Prezidente Repúblika hateten, nia atentu ho situasaun sira iha rai laran no liu husi enkontru sira ne’ebé nia promove ho akadémiku, sosiedade sivíl, konfisaun relijioza no organizasaun oioin, espera bele hatene ho di’ak realidade ne’ebé oras ne’e país enfrenta.

Prezidente Repúblika mós esplika oinsá lala'ok organizasaun Estadu tuir lei no garante ba estrutura movimentu ne’e nian, katak buat hotu ne’ebé halo sei la’o tuir de’it konstituisaun no lei ne’ebé vigora.

Kinta loron ikus ba Prezidente Repúblika atu hola desizaun ba OJE 2019, tuir kompeténsia ne’ebé Konstituisaun RDTL fó ba nia hanesan Xefe Estadu.