Vise Ministra Finansas, Sara Lobo Brites sei lori proposta orsamentu duadesimu ne’e ba konsellu ministrus hodi deside.

Tuir Lobo dehan, orsamentu duadesimu ne'e sei funsiona halo pagamentu ba funsionáriu públiku sira no utiliza ba transferénsia públika.

Totál orsamentu duadesimu ba fulan-Fevereiru nian ne’e sei utiliza ba kapitál dezenvolvimentu, bens serbisu, saláriu no vensimentu ba ezijénsia Estadu durante fulan-fevereiru nia laran.

"Orsamentu sufisiente ba ita hodi sustenta durante fulan-Fevereiru, atu responde ezijénsia estadu nian iha fulan ne'e,"dehan Sara ba jornalista iha palásiu Governu Dili, segunda (4/2).

Nia haktuir, totál saldu oras ne'e iha kofre estadu kuaze hamutuk montante tokon $200 dolar Amérika ne'ebé sufisiente ba governu atu utiliza durante orsamentu jerál estadu 2019 seidauk hetan promulgasaun.

Relasionadu saláriu ba funsionáriu kontradu tarde, tuir Vise Ministra Lobo dehan, falla hato'o relatóriu tarde husi kada ministériu. Tanba ne’e, Lobo husu ba ministériu sira ba fulan ida ne’e (Fevereiru) atu hato'o relatóriu sedu hodi nune’e bele rezolve.