Tersa, 18 Juñu 2019 | Login
Eis Prezidente Republika no Eis  Primeiru Ministru, Xanana Gusmao  Hamoos Baleta  iha area Kaikoli. FOTO: FB/Julio Gonsalves. Eis Prezidente Republika no Eis Primeiru Ministru, Xanana Gusmao Hamoos Baleta iha area Kaikoli. FOTO: FB/Julio Gonsalves.

Pro-Kontra Xanana Hamoos Baleta Featured

DILI: Iha Domingu (17/03) dadeer, eis Primeiru Ministru Kay Rala Xanana Gusmão tuun diretamente ba área inundasaun hodi hamoos baleta ne’ebé intupidu husi fo'er ne’ebé komunidade sira soe arbiru.

Xanana halo nia asaun ne’e iha baleta kuak iha area Kaikoli, iha RTTL nia sorin, edifísiu BOP, no fatin seluk tan. Komunidade barak mak hamriik hodi haree Xanana nia asaun ne’ebé akompaña husi Diretór ADN Samuel Marçal.

Ba asaun Xanana hamoos baleta iha tempu bee-sa’e, mosu pro-kontra husi deputadu sira iha Parlamentu Nasionál.

Bankada opozisaun sira iha Parlamentu Nasionál konsidera Xanana nia asaun ne’e nu’udar asaun hodi buka popularidade.

Tuir opozisaun sira, eis PM Xanana la presiza tama tahu laran tanba nasaun ne’e iha ninia sistema.

“Ita iha sistema ne’ebé funsiona par atu responde ba situasaun sira hanesan ne’e. Ne'e duni la presiza Xanana atu halo ida ne’e (hamoos baleta)”, deklara Vise Prezidente Bankada FRETILIN Francisco Miranda Branco iha plenária Parlamentu Nasionál (PN), Segunda (18/03).

Branco dehan, nia respeita tebes figura Kay Rala Xanana Gusmão, maibé nia hakarak mós atu buat hotu la’o tuir nia dalan.

Tuir nia, iha faze luta ba ukun rasik an buat ketak ida no faze ba konstrusaun asadu buat seluk ida. Tan ne’e tenke implementa ho di’ak regra hirak ne’ebé iha.

“Ha’u respeita tebes figura Kay Rala Xanana Gusmão nian maibé ita hakarak buat hotu la’o tuir nia dalan. Se FRETILIN nia kritika ne’e mak maluk deputadu sira la simu, entaun ita taka tiha instituisaun (estadu) sira ne’e, ita hotu-hotu tuun ba luku bee, luku tahu para bele rezolve problema inundasaun,” deklara nia.

Deputadu ne’e kestiona tanba sa mak iha governasaun anteriór ne’ebé Xanana lidera la halo sistema planeamentu ne’ebé di’ak atu bele rezolve problema inundasaun.

Iha fatin hanesan, Prezidente Komisaun G trata asuntu Edukasaun, Juventude, Kultura, no Sidadania, Albino Marçal Freitas la konkorda ho deklarasaun deputadu Branco.

Tuir nia, Xanana nia asaun ne’e la'ós retórika. Tanba iha tempu gerrilleiru Xanana hatudu kedan ona bainhira nia tein ba nia soldadu sira ne’ebé mak ba halo funu.

“Hahalok ida ne’e nia halo dezde tempu rezisténsia kedas. Tanba ne’e nia kontinua halo iha tempu ukun an ne’e par joven sira bele banati tuir ezemplu sira ne’e,” dehan nia.

Deputadu bankada CNRT José Virgílio R. Ferreira la konkorda ho deklara FRETILIN katak Xanana buka popularizmu.

Tuir nia, asaun Xanana ne’e nu’udar ezemplu atu eduka jerasaun foun sira.

“Ha’u hanoin maun Xanana de’it mak halo hanesan ne’e, laiha tan lider ida halo hanesan ne’e, satan lider FRETILIN nian halo ona saida?,” nia kestiona.

Read 1001 times
Rate this item
(1 Vote)