Lere Sujere Fó Kilat ba Guarda Floresta Featured

By Tomé Amado Janeiru 29, 2019 6293
Ilustrasaun guarda floresta. FOTO: SAPO24 Ilustrasaun guarda floresta. FOTO: SAPO24

DILI: Xefe Estadu Maior FALINTIL-Forsa Defeza Timor Leste (F-FDTL) Maijor Jeneral Lere Anan Timur sujere atu fó kilat ba Guarda Floresta hodi bele tau-matan di’ak liu tan ba natureza iha teritoriu Timor laran.

Tuir Lere, molok atu fó kilat ba Guarta Floresta, presiza mós muda naran “Guarda” Floresta sai “Polisia” Floresta.

Durante ne’e, Guarda Floresta halo esforsu maka’as hodi tau-matan ba aihoris no animal fuik sira atu ema labele estraga.

Maibé realidade tinan ba tinan ema sempre estraga no oho aihoris no aninal sira. Ho razaun ne’e Lere husu ba governu atu fó atensaun ba servisu Guarda Floresta.

“Ha’u hatete ona ba Ministru tenke troka naran Guarda Floresta hodi tau fali Polisia Florestal par bele kaer kilat” dehan nia ba jornalista sira hafoin remata kampañia sensibilizasaun hadomi natureza iha Lagua Tolu, Tasi Tolu, Sesta (25/01).

Tuir nia, sujestaun ne’ebé nia fó ne’e atu garante funsionamentu servisu florestal nune’e sira bele halo kontrolu to’o iha ai-laran tuan sira.

“Ha’u-nia hakarak ne’e sira tenke kaer kilat par ema mós bele tauk. Agora tau de’it guarda florestal ne’e mak dala-barak sira toba dukur tiha, balun ba buka tiha boek iha mota entaun ai-laran tuan sira ne’e ema estraga saugati de’it,” katak nia.

Rate this item
(0 votes)

Independente Digital TV