Tersa, 26 Marsu 2019 | Login
Primeiru Ministru Taur Matan Ruak partisipa direita limpeza jeral. FOTO: Media GPM Primeiru Ministru Taur Matan Ruak partisipa direita limpeza jeral. FOTO: Media GPM

Komunidade Asiste PM Taur Hili Fo'er Featured

DILI: Governu hasai ona despaxu hodi determina loron limpeza jerál iha loron Sesta kada fulan dala ida. Nune’e, Primeiru Ministru, Taur Matan Ruak, iha semana dahuluk tuun diretamente partisipa iha hamoos lixu ne’e.

Maski nune’e, komunidade balun seidauk iha konxiénsia hodi asiste (nonton) fali Xefe Governu, Taur Matan Ruak, bainhira hili fo'er iha sira ninia área.

PM Taur orienta membru Governu hamutuk ajente administrasaun públika hala’o limpeza jerál iha sidade Dili, maibé sidadaun balun tuur hodi haree de’it bainhira funsionáriu no membru governu sira halo limpeza.

Observasaun diáriu ne’e iha terrenu, Sesta (22/2), tuku 14:00-17:00, Xefe Governu tuun direta halo limpeza hahú husi Largo Lesidere too iha Metiaut.

Iha limpeza jerál ne’e maioria tasi-ibun nakonu plástiku hanesan botir mamuk no sasán uzadu sira ne’ebé komunidade soe arbiru.

Situasaun bainhira Xefe Governu hala’o limpeza jerál komunidade ho negosiante sira la kontribui, maibé sira hamriik fihir saida maka funsionáriu hamutuk ho membru Governu sira halo.

Iha biban ne’e, Xefe Governu bainhira hasoru komunidade sira aviza katak, nasaun ida atu sai sidade tenke soe lixu tuir ninia fatin, maski nasaun riku maibé komunidade laiha konxiénsia hadi'a ambiente oinsá Dili atu bele sai sidade furak.

Iha limpeza jerál ne’e, envolve mós instituisaun F-FDTL, PNTL, estudante ho ajente administrasaun públika iha palásiu Governu, inklui média sira.

Iha ninia intervensaun PM Taur dehan, limpeza jerál ho intensaun hakarak ambiente iha sidade Dili tenke moos, tanba ne’e Konsellu Ministru hatún despaxu ba intuisaun Estadu ho sidadaun sira iha fulan ida tenke limpeza jerál.

Eis-Prezidente Repúblika hateten, kauza soe lixu arbiru ne’e problema mentalidade timoroan sira laiha konxiénsia, tanba husi foho implementa iha Dili laran hodi soe lixu arbiru halo sidade fo’er.

“Ita lori tempu atu kombate, mais ha’u hanoin ita halo esforsu atu sensibiliza ita nia sidadaun nia kontribuisaun, espera katak ho kontribuisaun ne’e lori sidade ba moos,” tenik nia, iha Metiaut, Sesta (22/2).

Xefe Governu akreseta, tempu badak Governu hatún rezolusaun fó asaun medida ho regra atu obriga sidadaun hotu tenke limpeza. Iha regulamentu mós bainhira sidadaun sira soe lixu tenke simu pena todan mak selu multa no hataan ba justisa.

Taur dehan, sidadaun hotu tenke dixiplina iha ida-idak nia ambiente hodi hamoos lixu. Nasaun ida sai sidade tenke moos presiza konxiénsia husi komunidade sira oinsá kontribui ba sidade saudavel.

 

Read 253 times
Rate this item
(0 votes)