Sekretáriu Estadu Protesaun Sivíl (SEPS), iha Kinta (28/2), sei lansa ekipamentu deteta tsunami (Sirene) atu fó biban ba komunidade hodi prepara aan.

Sekretáriu Estadu Protesaun Sivíl, Alexandrino Xavier Araújo hateten, iha tore rua ne’ebé estabelese, nune’e bainhira tsunami ruma atu mai karik sei alarma ba Dili laran tomak hodi toma atensaun ba komunidade sira bele prepara-aan.

“Sei halo lansamentu ofisial sistema ne’e, liuliu kona-ba karik tsunami ruma atu sa'e”, dehan nia, iha Salaun Ministériu Interiór, Vila-Verde, horisehik.

Funsaun husi sirene ne’e lian atu bele fó hatene ba povu sira katak kuidadu-aan no mós bele prevene-aan. Ne’e hanesan sistema ida estabelese ba sistema prevensaun bainhira atu tsunami ruma presiza iha alerta ida povu sira.

“Agora daudaun ita iha ona planu sei harii tan sentru evakuasaun ba ita nia povu sira”, dehan nia.

Nune’e, identifika mós fatin soru-mutu ka buka malu hafoin mosu dezastre naturais ruma. Fatin ne’ebé identifika maka sei uza hela salaun jináziu eis-Gedung Matahari Terbit (GMT).

Maski nune’e, la'ós fatin seguru ba sentru evakuasaun. Ne’e duni, sei buka fatin ne’ebé aas iha Dili laran hodi utiliza sai fatin evakuasaun.