Gil Alves Husik Istória iha Setór Turizmu Featured

By Jacinto Xavier Marsu 21, 2019 8167
Jardín Cristo Rei. FOTO: dok Jardín Cristo Rei. FOTO: dok

DILI: Ministériu Turizmu liu husi Diresaun Nasionál konsidera eis-Ministru Turismu Komérsiu Indústria (MTKI), Gil Alves, konsege husik memória balun ne’ebé bele konta iha dezenvolvimentu setór turizmu iha Timor-Leste nian.

Diretór Nasionál Turizmu, José Filipe Dias Quintas hateten, matebian Gil Alves lidera MTCI iha tinan 2007-2012 halo servisu makaas, kriativu, inovativu no sempre halo kontrolu ba diretór sira atu implementa programa anuál ho susesu.

Mezmu buat barak la konsege halo, maibé ouituan halo ona hodi sai hanesan erransa ne’ebé matebian husik hela, nune’e bele kontinua dezenvolve iha futuru.

“Nia lideransa ne’e di'ak, hakarak implementa programa ida tenke hatudu rezultadu ne’ebé di'ak ba públiku”, dehan nia, iha knaar fatin, Faról, horisehik.

Durante matebian nia-mandatu konsege konstrui infraestrutura bázika iha área turístika sira hanesan, jardín Cristo Rei, Largo Lesidere, Santuáriu Papa João Paulo II Tasi Tolu, jardín iha Palásiu Governu oin, Jardín Motaél, no Jardín Aeroportu Komoro.

Alende ne’e, kria programa barak maibé koñesidu liu mak ‘Regatta Iata’ ka korrida bee ró husi Darwin mai Timor, ne’e sai ona eventu internasionál kada tinan sempre realiza programa ne’e.

Programa ne’e hahú inisia ona iha tempu Portugés, maibé to’o tiha tempu Indonézia programa ne’e lakon. Ho inisiativa matebian nian hamoris fali hodi promove turizmu marítimu, hodi atrai turista husi Austrália mai vizita Timor.

Nune’e, programa ida bolu dehan turizmu baze komunitaria, agora ne’e mós iha kontinuidade ho objetivu atu enkoraja komunidade sira iha baze atu envolve direita ba setór turizmu nian.

“Obra hirak ne’e mak nia husik hela mai ita sira ne’ebé sei moris atu haree hodi hatene. Tanba ne’e, ita presiza kontinua hodi hadi’a di’ak liu tan, maske orsamentu ne’ebé limitadu maibé ita tenta atu habelar to’o munisípiu sira”, dehan nia.

Matebian durante nia-mandatu sente setór turizmu ne’e importante, tanba ne’e implementa programa barak hodi dezenvolve setór turizmu, maibé la konsege tanba haree ba rekursu ne’ebé iha.

Rate this item
(2 votes)

Independente Digital TV