Nurima Alkatiri: “Ha’u-nia Mehi atu Kontribui…” Featured

By Humberto dos Santos Setembru 29, 2017 2580
Nurima Nurima

BA ema balun karik naran Nurima seidauk familiar, maibé se aumentan tan ho nia apalidu, Alkatiri, konserteza ema sei koñese nia ne’e see. Balun karik sei sig tun-sa’e, maibé balun bele hatene momoos ona.

Sim, feto ida ho naran kompletu Nurima Ribeiro Alkatiri nudar oan feto boot Mari Alkatiri, atual Primeiru Ministru.

Iha periodu ida ne’e, Nurima hetan fiar husi ninia partidu, FRETILIN hodi tuur iha Uma Fukun Parlamentu Nasionál.

Nurima dehan, nia nunka iha mehi atu sai deputada, maibé nia hakarak de’it atu fó kontribuisaun hodi dezenvolve rai no povu ida ne’e.

“Hau nunka iha mehi atu sai deputada, mais ha’u-nia mehi mak atu kontribui ba ita-nia rai,” dehan Nurima iha dadalia ho jornalista jornál INDEPENDENTE iha sala Bankada FRETILIN, Parlamentu Nasionál, Kuarta (27/09).

Atu to’o iha uma fukun la’os buat fasil ida. Presiza dedikasaun, loyaldade, komitementu no servisu maka’as ba partidu no ba povu Timor-Leste atu bele hetan konfiansa. Nurima konsege hatudu ida ne’e.

Dezde kiik, Nurima hahú ona hatudu nia an nudar “FRETILIN nia oan”. Nia kaer metin prinsipiu partidu FRETILIN ne’ebé nia komunga dezde nia moris mai.

Ho esfosu no dedikasaun ne’ebé nia halo, ikus mai partidu FRETILIN fó duni ninia konfiansa atu reprezenta partidu ne’e tuur iha Parlamentu Nasionál nudar deputada bankada FRETILIN.

“Hau sai deputada, tanba fiar husi hau nia partidu FRETILIN, tau hau iha lista tanba haree ba ha’u-nia envolvimentu iha partidu dezde ha’u sei ki’ik, ha’u sempre halo kontribuisaun ba partidu, lideransa partidu fiar katak ha’u kontinua fó kontribuisaun iha lejislatura ninian,” dehan nia.

 Koñese Nurima

Nurima Ribeiro Alkatiri nudar oan dahuluk husi Mari Bin Amude Alkatiri no Marina Ribeiro Alkatiri ne’ebé moris iha Maputo-Mozambike iha 1 Fevereiru 1982. Nurima nudar feto mesak ho alin mane na’in rua. Nurima forma ona familia no iha oan na’in rua.

Nurima hahú eskola iha eskola primaria 03 de Fevereiro Maputo-Mozambike no kontinua ba eskola Sekundariu iha Kolejiu Delta Maputo-Mozambike.

Hafoin remata estudu, iha tinan 2002-2004, Nurima kontinua nia estudu iha nivel universidade iha Universidade Carles Darwin-Australia hodi hasai Bachelor of Enviromental Science.

Iha tinan 2007-2009, Nurima hala’o estudu post graduasaun iha area Siensia Sosial iha Melbourne Australia.

Daudauk ne’e, Nurima hala’o ninia estudu masteradu (S2) iha University Melbourne Australia iha area international development.

Molok sai deputada, iha 2004-2005 Nurima hala’o serbisu nudar Koordenadora Nasional iha Ajensia Arafura and Timor Seas Experts Forum (ATSEF)  .

Iha 2007-2008 serbisu iha iha area Administrasaun Teknika iha Timor Sea Designated Authority (TSDA).

Iha 2009-2010 serbisu iha Union National Development Project (UNDP) hanesan Manajer iha departamentu National Adaptation Programmed of Action (NAPA).

Iha 2012-2015 nia servisu iha Embaxada Australia hanesan Koordenadora Senior ba Programa Igualidade Jeñeru no Vokal Poit ba Programa Jeneru Eliminasaun Violensia Kontra Feto.

Iha tinan 2015, Nurima hahú fokus on aba atividade partidu FRETILIN nian ne’ebé ikus mai nia hetan konfiansa hodi sai reprezentante povu iha parlamentu nasionál.

Rate this item
(1 Vote)
Last modified on Sexta, 29 Setembru 2017 15:10

Independente Digital TV