TR Alternativa Ikus Impase Polítika Featured

By Martinha Gusmão Agostu 28, 2018 6630
Luis Oliveira Sampaio Luis Oliveira Sampaio

DILI: Diskusaun entre Prezidente Repúblika no Primeiru Ministru kontinua la’o maibé la hatudu sinál pozitivu ruma atu solusiona impase polítika iha rai laran.

Ne’e duni, alternativa di’ak liu maka Kazu kona-ba lista kandidatu membru governu pendente, haruka ba ba Tribunál Rekursu (TR) hodi deside tuir dalan legál nian.

Diretór Ezekutivu Justice System Monitoring Programme (JSMP), Luis Oliveira Sampaio hatete, Xefe Estadu no Governu enkontru dala hira ona ida-idak kontinua mantein ninia pozisaun.

Konteúdu diálogu ne’e saida? Sira hasoru malu ne’e razaun saida? Agora primeiru ministru mós dehan katak mantein nafatin lista ne’e tanba ho razaun.

“Ha’u hanoin prezidente ho Primeiru Ministru tenke buka dalan seluk”, tenik nia, iha servisu fatin, Kolmera, Sesta (24/8).

Luis hatutan, kuandu diálogu mak la hetan solusaun labele ko'alia ba média de'it, tanba interpreta sala bele sai malahuk.

Ne’e duni, nia dehan, prezidente mai ho argumentu ida maibé Primeiru Ministru no bloku Aliansa Mudansa ba Progresu (AMP) la konkorda. Ne’e duni, bele lori ba Tribunál.

Maski nune’e, antes ne’e Prezidente Tribunál Rekursu, Deolindo dos Santos hatete, kona-ba pose ne’e tribunál laiha kompeténsia atu ko'alia tanba kompeténsia ba Parlamentu Nasionál, Governu no Prezidente Repúblika.

Antes ne’e, Prezidente Repúblika, Francisco Guterres ‘Lú Olo’ hateten, lista kandidatu membru governu ne’ebé haruka fila husu ba partidu koligasaun atu buka dalan hodi solusiona.

“Se sira maka prontu substitui ona, ne’e Xefe Estadu fó tomada de pose ne’e laiha problema”, tenik Lú Olo.

Prezidente Repúblika hateten, rezolve solusaun sira na’in sia ninia ne’e maka di’ak liu, ka solusaun nasaun ninia maka di’ak liu? Ida ne’e maka Xefe Estadu hakarak husik hela.

Hataan ba ne’e, Primeiru Ministru, Taur Matan Ruak, hakarak koko ho Governasaun ain tolu, maski ninia membru Governu balun sidauk toma pose hodi kompleta estrutura Oitavu Governu konstitusionál.

Nia argumentu, sira ne’ebé iha koligasaun laiha polítika, nein razaun jurídiku atu halo substituisaun. Ne’e duni Governu konkorda ho desizaun Xefe Estadu hodi insiste atu rezolve impase polítika iha rai laran.

 

Rate this item
(0 votes)

Independente Digital TV