Normalmente Tribunál Kontas halo auditoria sei haruka rezultadu ne’e ba instituisaun relevante sira. Ne’e duni, órgaun soberanu hirak ne’e mak labele asegura dokumentu konfidensiál ne’e labele monu ba públiku nia liman.

Diretór Ezekutivu Justice System Monitoring Programme (JSMP), Luis Oliveira Sampaio hatete, regra ka prosedimentu atu trata dokumentu sira ne’e, Tribunál Kontas la anúnsiu ba Públiku, maibé enkamina ba instituisaun relevante kompetente sira.

“Tanba etikamente ha’u hanoin polítiku sira tenke hatene atu proteje informasaun sira ne’e atu oinsá mak trata tuir nesesidade Estadu ninian”, dehan nia, iha knaar fatin, Kolmera, Sesta (24/8).

Nia fó ezemplu, aspetu balun husi relatóriu ne’e deskobre katak iha irregularidade balun, mekanizmu atu trata maka lei permite Parlamentu Nasionál harii komisaun inkéritu atu buka tuir informasaun sira ne’e.

Iha duni indísiu balun ba responsabilidade kriminál ruma , entaun tenke ba Ministériu Públiku ka Komisaun Anti Korrupsaun (KAK) atu bele buka dadus ne’ebé sira deskonfia, la'ós denunsia ba fatin ne’ebé la apropriadu.

Antes ne’e, tuir fonte konfirmandu hatete, projetu ZEEMS ne’e husi tinan 2016 to’o iha 2017, Tribunál Kontas halo auditóriu hotu ona no haruka relatóriu ba parte sira hotu.

Kona-ba auditóriu ba tinan 2018 ne’e tribunál seidauk halo auditóriu hotu tanba nia prosesu sei la’o hela.