Primeiru Ministru, Taur Matan Ruak hateten, laiha razaun kontinua estabelese g7+ iha Gabinete MPKM nia-okos. Ne’e duni hakarak husu apoia ba deputadu sira iha uma fukun PN hodi apoia Governu atu transfere g7+ ba MNEK.
“Pontu de vista barak bele ka lae transfere g7+ ba MNEK? Ha'u nia background ne’e militár no ha'u gosta institusionaliza sasán, la'ós adota maibé saida mak di'ak ba ita halo transferénsia atu buat hotu konsolidasaun ona”, dehan PM Taur, iha Uma Fukun PN, horisehik.
Nia esplika, Governu mantein kontinua investe g7+ tanba vantajen boot ba Timor Leste bainhira hetan suporta husi país internasionál sira.
Nia esplika, nu’udar nasaun ki'ik tenke hatudu aan ho nasaun seluk hodi fó vantajen ba Timor Leste, tanba nasaun ne’e enfrenta problema maibé mundu internasionál barak mak kontinua fó korajen.
Governu propoin tokon $1 atu finansia ba g7+ bainhira realiza atividade sira iha rai li'ur, tanba Governu tau prioridade hodi aloka montante atu kobre hodi kontribui Timor-Leste ba nasaun seluk ne’ebé envolve iha g7+.
Governu kontinua apoia finanseiru ba g7+, tanba nasaun ne’e ki'ik maibé interese maka’as ba nasaun seluk, nune’e Timor-Leste nia naran morin iha mundu tomak.
Entretantu, Deputadu Bankada FRETILIN, David Ximenes Mandati hateten, g7+ nu’udar instituisaun tenke hatene saláriu vensimentu ho bens servisu funsionáriu sira halo, bainhira halo viajen lokál ho internasionál tenke iha padraun.
Iha fatin hanesan, Deputadu Bankada Partidu Demokrátiku (PD), Adriano do Nascimento lamenta bainhira Governu apoia finanseiru ho montante boot ba g7+ maibé laiha benefísiu ba nasaun. Tanba orsamentu ne’ebé aloka ba sekretáriu ne’e di'ak liu maka kria kampu servisu ba timoroan sira ne’ebé dezempregu.
Tuir nia, Timor-Leste buka naran iha mundu internasionál hodi sakrifika povu, tanba laiha retornu boot husi g7+ atu benefisiária ba povu atu dezenvolve nasaun ne’e.
