Tersa, 18 Juñu 2019 | Login
ekretariu Estadu Juventude no Desportu no Sekretariu Jeral Federasaun Futebol Timor Leste (FFTL), Nelio Isaac Sarmento. FOTO: doc ekretariu Estadu Juventude no Desportu no Sekretariu Jeral Federasaun Futebol Timor Leste (FFTL), Nelio Isaac Sarmento. FOTO: doc

Nelio Isaac: Laiha Regra Rejigna Aan husi FFTL Featured

DILI: Sekretariu Estadu Juventude no Desportu, Nelio Isac Sarmento ne’ebé kaer mós pasta nu’udar Sekretariu Jeral Federasaun Futebol Timor Leste (FFTL) deklara laiha regra ne’ebé hatete nia tenke rejigna an husi nia kargu nu’udar Sekretariu Jeral FFTL.

Deklarasaun husi Nelio ne’e relasiona ho opiniaun balun ne’ebé husu atu nia rejigna an husi nia kargu iha FFTL.

Hanesan públiku hatene, molok asumi kargu nu’udar Sekretariu Estadu Juventude no Desportu, eis Sekretariu Estadu Komunikasaun Sosial ne’e assume ona kargu nu’udar Sekjer FFTL.

Iha fulan Marsu tinan 2017, Nelio Isac Sarmento hetan fiar husi Ezekutivu FFTL hodi sai Sekretariu Jeral FFTL troka pozisaun eis Sekjer FFTL Amandio ne’ebé hetan sansaun husi AFC no FIFA. Iha altura ne’ebá, Osorio Florindo, deputadu husi bankada FRETILIN, hetan “auto-nomeiasaun” husi Prezidente FFTL Francisco Kalbuadi Lay hodi sai Prezidente interinu FFTL.

Iha momentu ne’ebá, Nelio deklara katak nia hetan fiar husi ezekutivu FFTL atu troka Amandio hodi halo preparasaun ba Kongresu FFTL hodi hili estrutura foun.

Iha Kongresu FFTL Datoluk ne’ebé realize iha 24 Fevereiru 2018, Francisco Jeronomi hetan fiar hodi assume kargu Prezidente FFTL ba periodu 2018-2022.

Tuir estautu FFTL, Prezidente Federasaun hili liu husi Kongresu, enkuantu Sekretariu Jeral federasaun hili husi Prezidente FFTL liu husi reuniaun ezekutivu ne’ebé envolve asosiasaun sira.

Ho nune’e, Prezidente FFTL foun ne’e hili fila fali Nelio Isac sai Sekjer FFTL ba periodu tinan lima oin mai.

Bainhira mosu opiniaun ne’ebé hakarak Nelio rejigna an husi nia kargu iha FFTL, Nelio hatete, molok simu kargu iha governu hanesan Sekretariu Estadu Juventude no Desportu nia simu uluk ona knar hanesan Sekretariu Jeral FFTL.

Nelio dehan, laiha regulamentu ida ne’ebé obriga nia atu tenke rejigna an husi kargu Sekjer FFTL bainhira nia assume kargu iha governu.

“Laiha regra ida atu ha’u tenke rejigna aan (husi Sekjer FFTL), tanba antes ha’u simu (kargu) Sekretariu Estadu Juventude no Desportu ha’u iha Sekretariu Jeral FFTL,” dehan Nelio hafoin partisipa iha The Voice Timor Leste iha São Miguel, Sabadu (16/02).

Read 956 times
Rate this item
(0 votes)