Arão hatete, tanba estrutura governu la kompletu nune’e sei labele halo buat ruma, tan ne’e iha preokupasaun hodi ezije ba Prezidente Repúblika atu kompleta ona estrutura governu.

Nia dehan, bainhira ministériu balun mamuk, laiha ministru ka vise ministru, sei sai dezafiu boot ida ba governu.

“Membru governu inkompletu ita labele ezije governu atu halo ida ne’eba no halo ida ne’e,” dehan Arão iha PN, Sesta (15/02).

Atu garantia ezekusaun OJE, Prezidente PN ne’e hatete, presiza tebes atu kompleta ona ministériu hirak ne’ebé seidauk iha ministru no vise ministru nune’e sira bele ba hala’o nia funsaun hodi ezekuta orsamentu ho efisiensia no efikasia tuir politika governu nian.

Iha fatin hanesan, deputadu Bankada Partidu Demokratiku (PD) Mariano Assanami Sabino, fó hanoin hanesan katak orsamentu promulga ona maibé membru governu ne’ebé atu jere ministeriu 9 mak laiha ne’e fó impaktu maka’as tebes ba desizaun hodi ezekuta orsamentu.

Durante ne’e, nia hatete, problema ne’ebé sai polemika mak Orsamentu Jeral estadu (OJE) no kandidatura membru governu nain 9. Ba orsamentu hetan ona promulgasaun, nune’e faze tuir mai mak tenke tuur hamutuk hodi buka solusaun ba problema membru governu ne’ebé seidauk kompletu.

“Labele koalia politika barak liu maibé povu terus hela, ha’u hanoin laiha razaun atu tunda tan, tenke tuur hamutuk, diskute see mak di’ak liu atu bele ense atu governu bele la’o ba oin,” dehan nia.

Assanami fiar katak Prezidente Repúblika no Primeiru Ministru sei tuur hamutuk hodi rezolve situasaun politika ida hodi bele garantia governu ida ne’ebé estavel no kualidade ba implementasaun programa no ezekusaun orsamentu tuir nesesidade povu nian.

“Bain hira ministeriu sia ne’e mak laiha ministru ne’e problema boot, tanba ema ne’ebé atu foti desizaun hodi ezekuta osan ne’e laiha, entaun presiza rezolve liu husi Xefe Estadu no Xefe governu, liu husi AMP ne’ebé kaer governu ne’e,” katak nia.

Entretantu, tuir Vise Prezidente Bankada FRETILIN Francisco Branco hatete, nia parte lakohi kestiona kandidatu membru governu na’in sia ne’ebé seidauk simu pose tanba la’os sira-nia kompetensia.

“Atu buka solusaun ba ida ne’e kompetensia PR no PM nian,” katak nia.