Sexta, 26 Abril 2019 | Login
Eis Prezidente Repúblika José Ramos Horta. Eis Prezidente Repúblika José Ramos Horta.

Horta sei Konvense PR Lú Olo Promulga OJE 2019 Featured

DILI: Iha tempu badak, eis Prezidente Repúblika José Ramos Horta sei hasoru malu ho Xefe Estadu Francisco Guterres Lú Olo atu Promulga Orsamentu Jerál Estadu (OJE) 2019 no mos fó pose ba kandidatu membru governu pendente na’in sia.

Horta sei husu PR Lu Olo tanba hakarak ultrapasa lalais impase polítiku ne'ebé povu Timor Leste enfrenta durante tinan rua.

"Kuaze tinan ida nia laran, ita haree impase polítiku la iha Orsamentu, ne'e impaktu negativu ba ita nia ekonomia iha rai laran," dehan Ramos Horta ba Jornalista sira iha Palásiu Governu Dili, Sesta (01/2).

Nia hatutan, Prezidente Repúblika ema ne'ebé iha prinsípiu no ema polítiku, maibé tenki tuir Konstitusaun RDTL, hodi hatutan fleksibilidade, tanba papél Prezidente Repúblika nian la'ós baibain, maibé buka solusaun atu rezolve problema.

Horta deklara katak, Prezidente Repúblika tenki kria ambiente ne'ebé di'ak atu rezolve situasaun iha rai laran, tuir lei no konstituisaun haruka.

Alende ne'e, Horta mós sei kontinua konvense eis Primeru Ministru Mari Alkatiri atu labele espekula informasaun iha média sosiál ne’ebé fó impaktu ba governu.

Nia haktuir katak, Mari Alkatiri mós ema ne'ebé prontu Apóia VIII governu hodi ultra pasa lalais impase polítiku ne'ebé governu ne'e enfrenta.

Hakarak Diálogu, Hatudu Asaun

José Ramos Horta mós lamenta bainhira deputadu opozisaun iha Parlamentu Nasionál liu-liu FRETILIN sira hakarak diálogu, maibé tenki fasilita governu.

Nia dehan, opozisaun sira iha Parlamentu Nasionál ne'ebá sempre ataka koligasaun AMP hodi ejize governu atu diálogu, maibé atetude sira ne'e la hatudu pasu pozitivu ba povu ho governu ida ne'e.

Tuir Horta katak, governu hakarak diálogu maibé Prezidente Repúblika tenki Promulga Orsamentu Jerál Esztadu 2019 iha tempu badak, nune'e mós fó Pose ba kandidatu membru Governu nain sia ne'ebé pendente hela.

Bainhira ezijensia sira ne'e Prezidente Repúblika rezolve ona, fiar katak governu hakarak diálogu hodi dezenvolve estadu ne'e ba oin.

Tanba ne'e tempu too ona Prezidente Repúblika tenki kumpri ninia misaun, nune'e keta blokeia fali atividade no programa governu nian.

Read 747 times
Rate this item
(0 votes)