Konsellu Imprensa (KI) rasik simu ona keixa husi RTTL kona-ba aktu ne’ebé komete husi asesór balun ne’ebé atu intervein publikasaun notísia RTTL nian.
Ne’e duni, KI sente preokupadu makaas ho hahalok husi asesór ne’ebé hakarak atu muda konteúdu notísia ne’ebé redasaun RTTL rasik prepara atu halo publikasaun.
Prezidente KI, Virgílio Guterres da Silva hatete, lala'ok intervensaun polítika ba sala redasaun média sei fó impresaun negativa ba dezenvolvimentu média iha rai laran.
Tuir nia, aktu intoleravel ne'ebé komete husi asesór balun hodi fó presaun ba Redasaun RTTL nian iha prosesu publikasaun sei lori instituisaun média ne’e sai instituisaun polítika ba grupu balun.
Ho situasaun ne'e, sidadaun sira la goza sira-nia direitu liberdade ba flutu hodi foti informasaun ne'ebé sufisiente no kredivel.
Virgílio hatutan, polítika governu nian hodi halo mudansa ba estrutura RTTL liu husi apontamentu polítika hamosu dikotomia no ambiente ne'ebé la hakmatek ba jornalista sira hodi hala'o sira-nia atividade jornalizmu ho di'ak hanesan baibain.
Tanba ne’e, husu ba governu liuliu Ministériu Reforma Lejizlatura no Asuntu Parlamentár (MRLAP) atu altera lei RTTL hodi prepozisaun fali estatutu tuir artigu 41 pontu 5 Konstituisaun RDTL, atu servisu ba públiku la’ós órgaun ida atu hetan rendimentu hanesan instituisaun sira seluk.
Nune'e, husu mós ba Prezidente RTTL atu orienta asesór sira atu hatene ninia servisu inklui Prezidente rasik tenke hatene servisu, la’ós ba iha sala redasaun.
“Dirijente primeiru foti desizaun ba konteúdu notísia mak Xefe Redasaun laiha tan ema seluk, tanba ne'e mak ami husu ba Prezidente Administrasaun RTTL atu orienta asesór sira labele halo intervensaun ba sala redasaun", dehan Prezidente KI, iha knaar fatin, Kintál Boot, Sesta (1/2 ).
Nia hatutan, bazeia Lei Komunikasaun Sosiál, responsavel másimu ba konteúdu média nian maka Xefe Redasaun ho Diretór Informasaun, tanba bainhira fallansu husi notísia balun la’ós bolu Prezidente Administrasaun maibé bolu Xefe Redasaun no Diretór.
Tanba ne'e, husu ba jornalista sira hotu tenke solidariedade ba malu labele haree instituisaun seluk atu hakotu liberdade imprensa, bainhira intervensaun mosu presaun ba redasaun hotu-hotu tenke halo keixa ba Konsellu Imprensa.
Kazu seluk maka Xefe Gabinete iha ministériu balun halo tentativa hodi ameasa jornalista husi RTTL tanba de’it tau status iha média sosiál kona-ba problema ne’ebé mosu iha instituisaun ne’e rasik.
Tanba ne'e Prezidente KI husu governu atu fò xamada atensaun ba hahalok diskriminativu ne'ebé la kontribui ba prosesu demokrasia liberdade imprensa no liberdade espresaun iha Timor-Leste.
Nia dehan, bainhira jornalista sira hakerek notísia ba públiku mak la loos ka la tuir asesór ka xefe gabinete sira-nia hakarak, iha direitu atu halo xamada resposta, maibé la'ós telefone jornalista hodi bolu ba gabinete ameasa ka halo inkéritu.
Iha sorin seluk, hataan ba preokupasaun ne'e Prezidente RTTL, Francisco da Silva Gari, konsidera ne’e hanesan sujestaun atu bele hadi'a tanba prosesu servisu foin hahú.
“Ami tetu bele mellora servisu jornalizmu no ami mós ko’alia ona ho asesór sira husik Xefe Redasaun halo sira nia servisu hodi garante sira-nia independénsia”, dehan nia.
Tuir nia, liberdade imprensa la’o nafatin ba oin tanba seidauk iha rejime ditadura ida atu mosu, maibé importante mak presiza komunika ba malu.
Nia hatutan RTTL instituisaun públiku ne’e fó oportunidade ba sala redasaun atu sira bele hala’o knaar indepedentemente hodi fó informasaun ba povu la’ós atu fó ba grupu ida ka ema rua nian.
Kona-ba hahalok ne’ebé Xefe Gabinete halo ba jornalista ne’e hanesan familia, maibe laiha orientasaun ruma husi membru governu sira hodi halo intervensaun.
