Prezidente AMP, Kay Rala Xanana Gusmão hateten, AMP nian iha plataforma politika iha programa 2018-2023 sei hadia liutan sidade iha Manufahi, nune’e dada bee moos no estrada hodi responde nesesidade povu.

Xanana sadik partidu sira seluk atu apresenta programa prioridade munisipiu no mós programa planu estrategiku nasional, tanba programa VII Governu nian ne’e malae ida mak halo fó ba Governu hodi implementa.

“Bainhira povu Timor-Leste fó fiar ba AMP maka ekonomia iha imi nia rai sai buras liutan,” tenik Xanana, iha komisiu kampaña AMP nia, iha kampu futebol Same-Vila, horisehik.

Tuir nia, progrma dezenvolvimentu Manufahi mak haforsa autoridade kapasidade rekursu umanu no finanseiru hodi fó prestasaun servisu diak ba povu, promove trasparensia no akuntabiliidade ba jestaun finansas iha munisipiu.

Nune’e, infrastutura baziku iha Manufahi mak oinsá hadia estrada suku no aldeia, dada eletrisidade ba suku ho aldeia ne’ebé seidauk asesu, fornese bee moos no hadi’a saneamentu iha fatin sira ne’ebé presiza, hadia estrada no ponte ne’ebé liga ba Postu Administrativu Turiskai, Alas, inklui suku ho aldeia seluk.

Xanana hatutan, halo monumentu avo Xavier iha Turiskai, hadi’a infrastutura no jestaun merkadu iha munisipal, harii estadiu futebol no jinaziu nu’udar sentru desportu no arte kultura.

“Ekonomia iha munisipiu Manufahi sei buras, Betano ho Fatuberliu sei sai sidade tanba industria petroliferu,” promete Xanana.

Kona-ba dezenvolvimentu umanu iha Manufahi hametin asesu ba kualidade edukasaun no servisu saude iha nivel munisipiu to’o aldeia, hatun mortalidade ba inan liu husi bandu oan kaben sedu no saude inan ho oan ne’ebé diak.

Estabelese konsellu veteranu munisipiu no kontinua valoriza antigu kombatetente no veteranu, kontinua hakbiit feto hodi asesu ba kampu traballu, asegura dezenvolvimentu inklusivo husi projeitu tasi mane.

Prezidenti AMP dehan, ba dezenvolvimentu ekonomia maka promove ambiente nogosiu ne’ebé favoravel hodi atria investimentu privadu ba area potensial, dezenvolvimentu agro-komersiu no agro industria ba agrikultura no pekuaria no peska.

Nune’e, dezenvolvimentu empresa no mikro kiik no mediu hodi suporta industria petroliferu liuliu iha Betano, nune’e dezenvolvimentu turismu komunitaria istoriku no religiosa iha area Kablaki, Turiskai ho Alas, Fatoberliu Pousada iha Sameno Monumentu Boa Ventura iha Same.

Ikus liu sei harii fabrika bee konsumu internu hodi reduz importasaun bee husi rai li’ur.

Ho programa ne’e rasik Xanana husu povu husi Same tenke vota ba AMP nune’e hadiak liutan nesesidade povu Manufahi-oan hodi nune’e sidade liutan.